Ipmilbálvalusat leat nu máŋgga hámi.
Muhtun báikkiin lávlot sálmmaid gaskaáiggis, eará báikkiin ges hip-hop, ja muhtun báikkiin vel guktot seammá ipmilbálvalusas. Girkus leat mis ipmilbálvalusat, mánnágástta, konfirmašuvdna, náitosat ja hávdádeamit. Dát dagut čájehit min risttalaš árvvuid. Ipmilbálvalus lea Ipmila ja olbmuidgaskasaš deaivvadeapmi bálvaleami ja rohkadallama bokte. Sártnis áigu Ipmil juoidá muitalit dutnje.
Norggas leat Ipmilbálvalusat dábálaččat sotnabeaivvi dii. 11.00. Sotnabeaivi danin go dát lea Jesusa bajásčuožžilanbeaivi. Dii. 11.00 danin go dolin galggai boanda beassat gusaid bahččit ovdal go manai girkui. Muhtumin lea Ipmilbálvalus maiddái maŋŋágaskabeaivve-.
Maid dieđát du ruovttubáikki girkohistorjjás?
Sisdoalu birra
Girkus nannejuvvo oktasašvuođa. Mii váldit oasi risttalaš oktasašvuođas Ipmiliin ja guđet guimmiideametguin oskku bokte Jesus Kristusii. Ipmil ii hálit ahte mii galgat leat risttalažžan okto. Ipmilbálvalusas boahtá dát oktasašvuohta oidnosii go mii ovttas dovddastit oskomet, váldit vuostá bassi eahkedismállásiid, rohkadallat ja lávlut sálmmaid. Áhččámet lea rohkos maid Jesus ieš lea oahpahan midjiide.
Ipmilbálvalusas leat máŋgga oasi; biibbalteavsttat, sárdni, rohkosat, sálmmat ja bassi eahkedismállásat. Juohke sotnabeaivvis lea fáddá, mii mearrida biibbalteavsttaid, sártni ja makkár sálmmaid lávlut. Leat sierra liturgiijat gástta, konfirmašuvnna, hávdádusa ja heajaid várás. Sii geat leat veahkeheamen, barget iešguđetge bargguid ja devdet iešguđetge rollaid, ja buot mii dáhpáhuvvá, lea vissis ortnega mielde.
Man láhkái šaddá Ipmilbálvalus sámi Ipmilbálvalussan? Lea go dalle go sámegiella gullo? Lea go girkku čiŋadeapmi mii mearrida? Lea go sártni ja rohkosiid ja liturgiija sisdoallu? Lea go musihkka? Leat go sii geat váldet oasi Ipmilbálvalusas?
Sihke sámegiel sárdni ja sámegiel sálbmalávlun váikkuhit dasa ahte Ipmilbálvalus šaddá sápmin. Maiddái girkoviessu, dáidda ja girkku symbolat sáhttet váikkuhit dasa ahte Ipmilbálvalus oažžu sámi hámi. Liturgalaš biktasat maid báhppa, kántor ja katekehta geavahit, čalmmustuhttet maid sámevuođa ivnniiguin, symbolaiguin ja minstariiguin. Báikkálaš girku ja searvegotteráđđi áigu láhčit Ipmilbálvalusa nu ahte buohkat báikkálaš birrasis dovdet ahte girku lea maiddái sin girkun.
