Gullevašvuohta muhtumiidda dahje historjái

Muhtumat leat nu lihkoš ahte sis leat áhkut ja ádját geaiguin besset juohkit vásáhusaid. Muhtumiin leat eará lagas olbmot geaiguin juohkit vásáhusaidis.  Gullevašvuohta geaidda nu dahje historjái addá identitehta. Midjiide leat muittut lieggasat ja dehálaččat. Iežat soga historjá lea mávssolaš danin go addá dutnje identitehta maid sáhtát viidásut addit boahtte bulvii.


Oza dieđuid sogat birra ovttas áhkuin, ádjáin dahje earáin du lagasbirrasis!
 

Biibbalis muitaluvvo sihke eallima muora ja máhtolašvuođa muora birra. Muorra mas lea máhtolašvuohta sihke buori ja bahá birra. Biibbalis leat máŋgga ášši čilgejuvvon govaiguin. Jesus geavahii árgabeaigovaid čilget iežas birra. Muhtun muitalusas čilge son iežas viidnemuorran, ja mii olbmot leat dan oavssit.

Soahki/lageš/skirri lea muorra mii gávdno juohke sajis min guovllus. Das lea ruohtas, oavssit ja lasttat mat gullet oktii. Sáhttá guhkes, njuolga soagi gávdnat bivvalut báikkiin, muhto maiddái moalkái roaŋkelageža gávnnat biggosis báikkiin Soahki lea duodjeávnnas, boaldinmuorra ja huksenávnnas. Soahki sáhttá govvidit olbmoeallima, das leat oavssit mat olahit viidát, muhto buot oavssit leat šaddan oktasaš ruohttasis. Ruohttasat addet gullevašvuođa ja oadjebasvuođa. Mii leat čadnon ovddeš buolvvaide, iežamet sohkii.  

Jesus russiinávlejuvvui. Ruossa lea muoras dahkkon, ja lea šaddan vuoitomearkan danin go  Jesus bajásčuožžilii jábmiid luhtte. Ruossa muoras vuođđuduvvo min beastima Jesus Kristusa bokte.