Sámi girkodáidda
Girkolanjas leat dávjá máŋgga risttalaš symbolat sihke áltárgovain, biktasiin, bácciin ja govain. Girkoviesut leat dávjá huksejuvvon báikkálaš dábiid mielde. Sihke ivdneválljen, huksenávdnasat ja dáidda sáhttet dán čájehit.
Govvadáidda čájeha eanáš háviid muitalusaid Biibbalis. Máŋgga searvegottit sámi guovlluin leat háliidan áltártávvaliid govaid haga. Muhtun girkoviesuin lea dušše ruossa, alit duogážiin. Alit ivdni lea almmi ivdni. Dán láhkái galgá áltárgovva muitalit ahte dušše ruossa čájeha almmi midjiide.
Dovddat go girkoviesuid mas leat symbolat, ornameanttat, dáidda, ivnnit, ja atnindávvirat mat čájehit sámi árbevieru? Symbolageavaheapmi ja dan maid olmmoš oaidná girkolanjas lea dávjá dát, mii amasmahttá dahje oahpásmahttá olbmo. Mii dat lea, du mielas, mii dagašii girku sámi girkun Sámi ássiide?
Duoji sáhttá juohkit čoarveduodjái, muorraduodjái, dipmaduodjái ja dáidagii. Leat gal ovdamearkkat ahte dát leat geavahuvvon girkočiŋaheamis. Čohkkirasa girkus davvi-Ruoŧas lea dáiddár Lars-Levi Sunna duddjon orgeltangeanttaid soagis, čoarvvis ja sisttis. Eanodaga girkus davvi-Suomas čájeha áltártávval gávttehas sápmelaččaid ja bohccuid. Sirpmá girkus lea dáiddár Eva-Britt Varsi čiŋadan sárdnestuolu sámi ivnniiguin ja minstariiguin. Kárášjoga ođđa girku lea goahtehápmásaš viessu.
Sisdoalu birra
Girkus nannejuvvo oktasašvuođa. Mii váldit oasi risttalaš oktasašvuođas Ipmiliin ja guđet guimmiideametguin oskku bokte Jesus Kristusii. Ipmil ii hálit ahte mii galgat leat risttalažžan okto. Ipmilbálvalusas boahtá dát oktasašvuohta oidnosii go mii ovttas dovddastit oskomet, váldit vuostá bassi eahkedismállásiid, rohkadallat ja lávlut sálmmaid. Áhččámet lea rohkos maid Jesus ieš lea oahpahan midjiide.
Ipmilbálvalusas leat máŋgga oasi; biibbalteavsttat, sárdni, rohkosat, sálmmat ja bassi eahkedismállásat. Juohke sotnabeaivvis lea fáddá, mii mearrida biibbalteavsttaid, sártni ja makkár sálmmaid lávlut. Leat sierra liturgiijat gástta, konfirmašuvnna, hávdádusa ja heajaid várás. Sii geat leat veahkeheamen, barget iešguđetge bargguid ja devdet iešguđetge rollaid, ja buot mii dáhpáhuvvá, lea vissis ortnega mielde.
Man láhkái šaddá Ipmilbálvalus sámi Ipmilbálvalussan? Lea go dalle go sámegiella gullo? Lea go girkku čiŋadeapmi mii mearrida? Lea go sártni ja rohkosiid ja liturgiija sisdoallu? Lea go musihkka? Leat go sii geat váldet oasi Ipmilbálvalusas?
Sihke sámegiel sárdni ja sámegiel sálbmalávlun váikkuhit dasa ahte Ipmilbálvalus šaddá sápmin. Maiddái girkoviessu, dáidda ja girkku symbolat sáhttet váikkuhit dasa ahte Ipmilbálvalus oažžu sámi hámi. Liturgalaš biktasat maid báhppa, kántor ja katekehta geavahit, čalmmustuhttet maid sámevuođa ivnniiguin, symbolaiguin ja minstariiguin. Báikkálaš girku ja searvegotteráđđi áigu láhčit Ipmilbálvalusa nu ahte buohkat báikkálaš birrasis dovdet ahte girku lea maiddái sin girkun.
Velg emne:
