Ipmil já Job

Hearrá vástidii Jobii ramádaga siste:

 Gii leat don guhte
sevnnjodahtát mu áigumuša
jierpmehis sániiguin?

Ráhkkan, leage olmmái,
vástit munnje go mun jearan dus!

 Gos don ledjet dalle
go mun bidjen eatnama vuođu?
Muital munnje, jos don dieđát!

Gii mearridii dan mihtu
— suige don dan dieđát?
Gii njulgii mihttobátti dan badjel?

 Gosa vuodjuduvvojedje
dan vuođđudusat,
gii bijai dan čiehkageađggi,

 go buot guovssonásttit lávlo,
ja ipmilbártnit čurvo ávuin?

Gii dahpai ábi uvssaid duohkái?
Go dat bávttai ovdan
eatniheakkas,

 ja mun adden dasa
balvvaid gárvun
ja suhkkes mierkká giesaldahkan,

 dalle mun bidjen dasa ráji
ja dahppen dan poarttaiguin
ja bummaiguin.

 Mun celken:
«Dán rádjái don beasat,
it guhkkelii,
dása bisánit du čeavlás bárut.»

Leatgo don goassege
gohččon iđida ihtit,
leatgo čájehan iđitguksui
iežas saji,

 vai dat dohppešii
eatnama ravddaide
ja savdnjilivččii ipmilmeahttumiid
das eret?

Dalle eanan rievdá dego láiri
seailla vuolde,
buot ihtá dego ođđa gárvvuin.

Ipmilmeahttumat manahit
čuovggaset,
gážžárat cuvkejuvvojit.

 Leatgo don ollen ábi ádjagiidda
dahje vádjolan
čiegus čiekŋalasaid?

 Leatgo oaidnán
jápmima poarttaid,
leatgo geahččan olggumuš
seavdnjadasa uvssaid?

 Ipmirdatgo eatnama viidodaga?
Muital jos dieđát buot dan!

 Gokko lea luodda
čuovgasa vissui,
gos lea seavdnjadasa báiki?

 Donbat lávet doalvut daid
dohko gosa dat gullet,
donbat dovddat bálgáid
daid vissui?

Almma don dieđát,
almma don dalle juo
ledjet riegádan,
donhan leat eallán nu guhká!

 Leatgo don leamaš
muohttagiid vuorkkáin,
leatgo oaidnán
čuorbmasiid vuorkáviesuid?

 Daid mun lean seastán
áŧestusa áigái,
doaru ja soađi beaivái.

 Man luotta mielde
čuovga suonjarda,
mo viidána nuortabiegga
miehtá eatnama?

 Gii rahpá renniid ráššoarvái,
gii mearrida bajánii
ja álddagassii luotta

 ja diktá arvit eatnamii
gos ii oktage ása,
olbmohis meahccái,

nu ahte ávdin guovlu
gallehuvvo čáziin
ja rássi šaddá eatnamis?

 Leago arvvis áhčči?
Gii sahkanahttá
suoldnegoaikkanasaid?

Guđe eatniheakkas
boahtá jiekŋa?
Gii riegádahttá almmi bizi?

 Čáhci gokčašuvvá
dego geađgelohkiin,
čiekŋalasa bajildus stirdu.

 Máhtátgo don čuolbmadit
Nieidagihpu báttiid
dahje čoavdit
Čuoiggaheddjiid láhkkiid?

 Dongo divttát eahketnástti
badjánit rivttes áigái,
dongo láidet Sarvaga
ja dan misiid?

 Dovddatgo don almmi lágaid,
oaččutgo don dan ortnega
gustot eatnama alde?

 Máhtátgo don
čuorvut balvvaide,
nu ahte čáhci šávvá du badjelii?

Máhtátgo don
vuolggahit álddagasaid,
nu ahte dat vástidit:
«Dá mii leat!»    

Job. 38:1-35