Ipmila dolla
Paulus Utsi čállá divttas ahte dolla lea nugo eallinguoibmi. Dolla lea álo leamaš ja lea ain dál ge mávssolaš min birgejupmái. Muhto amma hal dolla lei ovddeš áigái eambbo dárbbašlaš?
Dolla addá čuovgga ja lieggasa, ja mii oaidnit buorebut dola čuovggas ja dat veahkeha min eallimis birget. Dolla ja hilla govvidit dávjá ráhkisvuođa, buorrevuođa ja ustitvuođa olbmuid gaskkas. Go mii leat meahcis oktonassii, de sáhttá dolla leat buorren ustibin mii veahkeha ija badjel beassat. Dolla lea buressivdnádus. Nuppi bealis dolla sáhttá leat várálaš midjiide ja earáide jus ribahit dola viidánit badjelmeriid.
Biibbalis muitala dan birra go máhttájeddjiide bođii vuoigŋa dego garra riđđubiegga, ja oidnojedje dollanjuokčamat máhttájeddjiid oivviid bajábealde. De sii máhttigohte buotlágan gielaid.
Dola čuvvo attáldagat. Biibbala apoasttal Paulus čállá girjjis korintalaččaide ahte vuoigŋa lea addán midjiide iešguđetlágan attáldagaid. Buot boahtá seammá vuoiŋŋas. Amma hal dát ollašuvvá dievaslaččat go mii diktit biekka bossut hilaide dola?
