Foto: Maria Svensk
Rupmaša bearráigehččet eanas dáhpáhusain buohcceviessu, dikšunviessu dehe, lihkohisvuohta oktavuođas, poliisa. Sii fuolahit das ahte rumaš dolvojuvvo rumašvissui seammás go ii leat dárbu vuos mearridit gisttu oastima birra. Oameolbmot sáhttet baicca ráfis válbmet hávdádusa. Lea dehálaš beassat dahkat dearvvuođaid, earenomážit eallima loahpas - jápmimis. Dalle sáhttet dábit ja symbolat hávdádusa oktavuođas leat jeđđehussan ja dorvun váttis ja hearkkes earráneamis.
Vuosttaš lávki
Ovdalaš áiggis olbmot vulge njuolga báhpa lusa go soamis jámii. Dán áiggi galgá almmuhit jápmima báikkálaš vearroeiseváldái. Dat sáhttá leat buorre vuosttaš lávki jos háliida álggahit proseassa. Dat čállet hávdádan- ja kremerenduođaštusa mii gáibiduvvo hávdádusa várás. Vearroeiseváldis oažžu maid eará dokumeanttaid dego registeroasi (mii dárbbahuvvo báŋkooktavuođain), jápminduođaštusa ja sohkaiskkadeami (dárbbahuvvo maŋŋelis beassečilgehusas).
Váldde oktavuođa searvegottiin
Buoremus lea jos oameolbmot ieža váldet oktavuođa searvegottiin ja dainna báhpain gean háliidit čađahit hávdádusa. Dalle sáhttet várret beaivemeari hávdádusipmilbálválussii ovttas ja sogat dihtet álggu rájis ahte ožžot dan báhpa gean háliidit. Báhpa ja áiggi hávdádusipmilbálvalussii ii dárbbaš várret hávdádusdoaimmahaga bakte.
Ságastallan báhpain dehe diakonain
Jápmima ektui mii leat lunddolaččat eahpesihkkarat ja balus. Go moraš ja jápmin duostu min de dat dovdu sihke gorudii ja sillui. Muhtimin moraš sáhttá dovdut ila lossadin guoddit akto. Báhpat ja diakonat leat hárjánan gávnnadit olbmuiguin mat leat váttis diliin ja sis lea jávohisvuođabággu. Váldde oktavuođa iežat báikkálaš searvegottiin.
Ii leat daddjon movt galgá moraštit – buohkat dahket nu movt sidjiide heive ii ge oktage vuohki leat buorit dehe heajut go muhtin eará vuohki. Mii fertet ipmirdit ja dohkkehit ahte mii hálddašit morraša iešguhtemet ládje. Dat sáhttá leat vuollánemiin ja suruin dan badjel mii ii goasge daddjon dehe dahkkon, juobe suhtuin go leat guđđojuvvon. Sáhttit maid dovdat geahppáneami jos dat gii lea jápmán lei guhka skibas ja jápmin šattai dego bestojupmin sutnje.