Okei, olbmot.
De lei vas áigi čálistit veahá otná vásáhusaid birra.

Dego ii lean doarvái ahte lean ožžon paraplya, de lean maiddái álgán mannat lášmmohallanvistiide zumba dánsoset ja veahá nu ain maid gávpotolbmot dahket.

Mon ledjen goit leamaš ihána jierbmái iežan mielas ja bidjan čoavdaga gitta nubbi hárjehallanskuvvii. Dovden iežan máilmmi lášmmimus olbmožin go vázzen birra visot fancy apparáhtaid gaskal (maid in leat goassege ovdal oaidán, muhto dát ii aktage diehtán). Juohkehaš sihkkarit navddi mu hárjánan lášmmohallin go ledjen vel nu hárjánan ládje čulbmen skábečoavdaga gitta skuovvabáttiide.

Dieđusge ii soaitán ÁIBBAS jáhkehahtti; visot nuppiin ledje pulsdiimmut ja hui lávges, divrras lášmmohallanbiktasat, Kari Traa, Nike ja diekkárat gonnes čužžo “I train like a BEAST” ja “Your work-out is my WARM UP”. Ieš mus ledje soames dábálaš joggebuvssat man lean áhčis árben ja boares, lurbe, čuvgesrukses t-skirtu gonnes čužžui “Márkomeannu ‘06”. Muhto ii galgga beatnaga gulgii geahččat, mon goit dovden iežan dego Hulken go vázzen sisa zumba-látnjii.

Buori movttain dánson zumba. Ledjen áibbas mielde, gahppen ovddos maŋus, spežžojin gieđaid ja čurvojin HAH dego karate kid go šlengejin mu oanehis juolggi bajás áibmui. Váiban, duhtavaš ja bivastuvvan máhccen molssadanlátnjii go diibmu lei geargan, nuoladin hárjehallanbiktasiid, válden sáibbu skábes olggos, lássejin vai ii aktage suola suolát maidege (gávpogis ii geava luohttit geasage) ja riššudin guhka.

Go vas máhccen molssodanlatnjii ja iežan skáhpii, ohcen ovttas skuova gonnes čoavdda lei. Muhto de fuobmájin, ii lean rivttes skuovva. Dát skuovas ii lean makkárge čoavdda gitta. Nubbi skuovva lei lássejuvvon skáhpii sisa. Fáhkkestaga in dovdan iežan šat Arnold Švartsneggerin, muhto baicce máilmmi jallamus ja unnimus olbmožin. Maid dal? Sihkaldat ja visot lei skábes, ja dán ii ábuhan rahpat. Geahččalin gaikut visot maid nagodin, muhto in mon lean gusto nu gievra go jáhkken váikko ledjen lášmmohallanguovddážis leamaš.

Doppe ii lean oktage geas sáhtášin jearrat ráđi, nu ahte vertejin beare vas coggat hárjehallanbiktasiid ja viehkat vulos resepšuvdnii veahki viežžaset. Rukses muođuiguin ja áibbas njuoska vuovttaiguin mat čuggeje juohke guvlui. Jáhkken ahte viežžat veahki galggai leahkit johtilis hommá. Muhto nu ii šaddan, go maid mon oidnen go ollejin resepšuvdnii. Olles Oslo Taekwondo-klubb bođii mu ovdalis, ja vertejin beare čuožžilit sin duogabeallai ja vuordit botta 50 máná taekwondo-biktasiiguin oste jieŋa. Mu vuovttat goaiku ja mon orron sihkkarit leamen máilmme heanemus BIVASTUVVAN olbmožin. Mu mielas orui ádjáneamin sihkkarit BEALLEJAGI vuordit, ja olles Norgga álbmot váccii meaddil ja geahčai munnje stuorra, healmmastuvvan čálmmiguin.

Go VIIMMÁT šattai mu vuorru, mon savkalin hui jaskadit “Lean lássen čoavdaga skáhpii sisa, sáhtašeiddet go mu veahkehit?” In háliidan ahte juohkehaš galggai diehtit man jalla mon ledjen. In lean ovdal ollen loahpahit cealkaga ovdal go resepšunista čergii “JAHA, DON LEAT LÁSSEN ČOAVDAGA SKÁHPII SISA! VUORDDE VEAHÁ”. Olbmot jorggehe ja boaguste mus, nu goit dovdui.

Go mu skáhpe viimmat lei ráhpon, mon hoahpuhasten bivttastit ja vihken ruoktut. Nuppi beaivvi vulgen gávpogii ja osten ođđa lása, dán háve diekkár masa ii dárbbaš čoavdaga…

– Ánná Káisá