Hallo blogga!

Bearjadaga lei sámi álbmotbeaivi WOHO! Jagi suohttaseamos beaivi. Viimmat juoga dáhpáhuvai man birra sáhtán bloggestit, muđui beare boran, logan ja nohkan. Muhto bearjadaga, dalle ávvudin!

Gaskavahku liktejin liinni, duorastaga šelggodahtten silbaboaluid (vuosttáš geardde eallimis, dál lean albma sápmelaš) ja bearjadaga dat stuorra beaivi lei ollen! Sámi álbmotbeaivi han lea jagi stuorimus happening, nu ahte lean illudan dasa juo juovllaid rájis, jus ii ovdal.

Duorastaga velledin nohkažit juo oktanuppelogis vai oččolin guhka nohkkat. Mus lea oainnát váttisvuohta dainna ahte go lean váibbas, de oaččun dan maid moai oappáinan gohčodetne Partapuoli-čalbmin. Muhto mon vellen ja vellen, ja nahkárat eai boahtán.

Mon NU illudin! Go giddejin čalmmiid de gullen beare GUUUHKKIN DAAAVVIIIN DÁÁÁVGGGAID VUOOOLDE oaivvi sinne, ja in nagodan dan bissehit váikko govt de geahččalin. Diibmu njeallje isken diimmu, ja dalle diibmu lei (árvit) njeallje!!! Dan maŋŋá nohkken. Muhto árvit de goas badjánin; kvárta váile guhtta! Ja dalle in gillen šat geahččalit nohkkat, go galgen riššut ja bivttastit ja leat gávpogis ovccis.

Nu ahte dalle vertejin olles beaivvi vázzit birra Partapuoli-čalmmiin, namalassii dat čalmmiin:

Dat maid lea veahá váivi dainna lea ahte olbmot soitet jáhkkit ahte maid duođai geahččalan dahkat lea dát:

Váikko in jáhke dán jur…

Muhto birgejin goit olles beaivvi, ja mus lei hui somá!

Jos dii geat dovdabehtet mu imástallet dán čalmmi, ahte ehpet lea dán ovdal oaidnán, de sáhtán muitalit ahte lean vihttanuppelot jagi hárjehallan álo loktet ovtta čalmmi veahá, nu ahte erohus ii dábálaččat oidno. Hehee.

Mon in dieđe lea go beare mon, muhto láven goit hui njuorasmuvvat sámi álbmotbeaivvi. Visot søtas unna sámemánát, sámi soga lávlla, gákti, luohti. Lea go dábálaš, vai leango mon beare vearrámus našunalista Hitlera rájis? (Árvideamis)

Sáván ahte dis maiddái ledje hávskes ávvudeamit!

Dearvvuođat Ánná Káissás!

Got dii ávvudeiddet sámi álbmotbeaivvi? Čále midjiide: samasblogg@biegga.com
________________________________________________________________________________
På norsk: Innlegget handler om Ánná Káisás nasjonaldagsfeiring; om hennes “lazy eye” og hvor rørt hun blir av små samebarn og samefolkets sang.