Máŋgasat eai soaitte diehtit dan doppe Sámi ávdin duoddariin, muhto ihttin, guovvamánu 14. beaivve, lea Valentinabeaivi; ráhkisvuođa beaivi.

Nugo visot ieža dáppe Ušllus de dát lea hui stuorra diŋga. Dáppe olbmot leat ihána ávvudeamen juohke diŋgga man birra mii eat leat oba gullan ge Lánttedievás, dat unna gilážis gos mon boađán.

Valentina-beaivi de dego galgá addit koartta ja liđiid sutnje geasa du váibmu gullá. Muhto, mon in leat goassige oažžun in koartta inge liđiid. Ja duođai de dat han beare lea materialisttalaš dušši (dajan beare go in leat goassige oažžun). Muhto DIVTTAT leat suohttasat!

Mon han lean unna sámi Shakespeare, nu ahte odne botta go čohkken logaldallamis skuvllas de čállen moadde ráhkisvuođadivtta didjiide illun ja inspirašuvdnan.

Dát lea veahá ahkit, muhto áibbas ok:

Mu váibmu nu dearpá
go don boađát millii
Ringes fal munnje
jos dus šaddá dilli

Dasa liikon hui:

Du čalmmit leat násttit
Du liiki nu liinnis
Buot nuppit leat fásttit
ja don leat fas fiinnis 

Ja dat lea fas huuui søt mu mielas:

Niegadan du juohke ija
it don oba dieđe ge
Čálán dutnje poesiija
liikošit go munnje de?

Jurdilin beare dadjat ahte jos mus leat doppe bloggalohkkiid gaskal soames gii niegada čuvgesrukses nieguid mu (dahje soames ieža) birra, čáles ráhkisvuođadivtta kommentáraráidui, dahje sádde min čujuhussii samasblogg@biegga.com !

Dieđusge lea maiddái lohpi sáddet liđiid, šuhkoláde ja koarttaid ruoktut mu lusa.

NÁ DE, de valentinabeaivi sáhttá boahtit. Állet dal beahte mu, lohkkit!

Ahhhh, ráhkisvuohta…. šuooohk ❤

Dearv. Ánná Káisá

Ps. Maid din mielas mu divttaid? Galggalin go álmmuhit poesiijagirjji?

EDIT: Jos háliidehpet oaidnit vel ovtta ráhkisvuođadivtta, deaddil sisa das ja geahča kommentara man leat ožžon!
____________________________________________________________
På norsk: Ánná Káisá er i det romantiske hjørnet.