Mon lean álo gohčodan iežan sápmelažžan. Mon in leat norggalaš, inge ruohalaš, mon lean duššefal okta diŋga, ja dat lea sápmelaš. Inge leat goassige ipmirdan olbmuid geat dadjet ahte lean beali dien ja duon, goalmmadasoasi dien dege sihke ja. Muhto dieđusge; identitehta lea máŋggabealat, iige maidege lea buoret go mii nu ieža, muhto MON lean sápmelaš.

Muhto váikko nuppit eai beasa mu gohčodit norggalažžan, de muhtumin ieš oaččun diekkár albma norgga, dahje ruoha, dovddu. Muhtumin mus leat rievtti mielde veahá identitehtaváttisvuođat.

Dá leat mus guokte ovdamearkka:

1)
Dál go leat leamaš máilmmimeašttirčuoigamat, man birra lean juo veahá čállán, in riekta dieđe makkár riikii gulan.
Ná lea dalle:
Mon: HEIA SVERIGE!
Mon: KOM IGJEN, SVERIGE!
(Norgga čuoigi vázzá ruoha čuoigi meaddil.)
Mon: HEIA NORGE!
Eadni: It go don easka heien Ruoha?
Mon: In, mon han lean norggalaš.
Mon: KOM IGJEN, NORGE!
(Ruoha čuoigi vázzá norgga čuoigi meaddil ja vuoitá.)
Mon: Du gaaaamla, du friiiia du fjääällhööga nooord

2)
Nubbi ovdamearka. Lean ipmirdan ahte dát lea veahá imáraš ovdamearka. Muhto ovddit geasi de mii oaččuimet grilla. Mon ja mu oabbá leimme grillemin spiidneerttegiid veranddas.
Oabbá: Mus lea nu somás dovdu.
Mon: Mus nai. Dovddan iežan nu DÁŽAN!
Oabbá: MON NAI!
(Jáskatvuohta. Mii joatkit grillemis, goappašagat hui duđavaččat.)
Oabbá: Iigo lea buorre dovdu?
Mon: Juo!

De mii boraimet grillenbiepmuid ja návddašeimme dážavuođa, ovdal go bordigođiime duljiid ja goikebiergguid biilii ja vujiime duoddarii. Ja de šadden fas sápmelažžan.

Geahččalin muitit eanet dakkárlágan fearániid, muhto in jáhke ahte leat šat. Konklušuvdna lea ahte mon lean eanemus áiggi sápmelaš, MUHTO in go leat čuigosat TVas inge go lean grillemin.

Goas DON leat sápmelaš?

Dearvvuođat Ánná Káissás

På norsk: Ánná Káisá gjør seg tanker om når hun møter på identitetsproblemer, for eksempel når hun griller.