Muittán dolin, go mon mánnán bohten ruoktut skovlái guhkes geasseluomu maŋŋá, de lávejin alo veahá váivašuvvat. Oainnát juohke jagi lei seamma: VISOT mánát ledje leamaš mátkkošteamen visot máilmme riikkain. Ja mon fas, mon ledjen leamaš duoddaris.
Vearrámus lei go láviimet sárgut ja čállit luomu birra. Nuppit mánát sárgoje elefánttaid, kamelaid, pálmmaid, tempeliid ja mearragáttiid. Mon fas sárgojin dan seamma boares bohcco ja lávu. Mon liikon hui váris šlundádit, muhto nuppit mánát láveje mu boagustit, ja oahpaheaddjit fas mu árggašit, go mon juohke jagi in dahkan eará go soames ávdin vári nalde campet.
MUHTO DÁL! Mon lean leamaš luomus! Mon lean mátkkoštan olgoriikii! Mon lean leamaš Venezias! Ja viimmát de mon galggan nai beassat muitalit mu mátkevásáhusaid!
Dá lea mon Venezias. Juo, mu eadni lea hui čeahppi govvet.
Vázzen birra kámerain, kárttain ja stuorra t-skirttuin man nalde čuoččui “Venezia”. Dovden ahte turistahommá heivii munnje.
De mon ledjen museas gos soames italienalaš mátkkošteaddji sárgon kárttat ledje vurkon.
Laponia lea iežas riika! Sárgojun sisa Norvegen ja Sweden bajábeallái. Ja dat lei gaskamuttos 1500-logu! Doppe čuoččui vel “Piti lappmarck” ja “umi lappmarck” ja diekkár diŋggat! SOMÁ! Ii leat go čuovvut daid boares rájáid, ja de mii reidet sierra sámi stađa hehehehe!
Maid mon fuobmájin go ledjen doppe lea ahte Venezia lea JUSTE dego Sápmi. Dii diehtibehtet daid sámi bojáid. Sis leat iežaset skohterat mainna vudjet birra birra jandora, soaitá sigareahtta vel heaŋgámin njálbmečiegas. Beaivečalbmelásit leat nalde, dávjá pilot-láset, ja capsa dieđusge. Sis lea hui attitude ja čolgalit juohke viđat minuhta. Ná lea das nai, beare vanccaiguin. Dovden iežan dego ruovttus.
Eanemusain lea mohttorvancca de, muhto lean healban govvet daid albma hønkkaid
Sáddes sisa du mátkevásahusaid! Dahje mii nu eará! Sámásmuinna-blogga lea reidejuvvon nu ahte juohkehaš sáhttá sámegillii čállit. Muhto dál dovdo veahá dego mus lea dát blogga okto.
– Ánná Káisá
samasblogg.wordpress.com 