Bures juohkehaš!
Nugo dii soaitibehtet juo ipmirdan, de liikon hui divttaide. (Loga mu ráhkisvuođadivttaid dás!)
Sámegiella lea hui somás diktengiella, dan dihte go leat nu unnan sánit mat heivejit oktii. Lea dego nu ahte jos leat ovtta sáni čállán, de vertet váldit dien sáni mii čuodjá seammaládje, ja muhtomiin lea dušše akta sátni mii heivešii. Nu ahte dálle vertet čállit dán áidna sáni. Ja de fáhkkestaga leat čállán divtta man nu birra man it oba plánen ge.
Ovdamearkka dihte ná, dál galggan čállit divtta blogga birra:
Čálán bloggii
bohcco doggi
márfenáigi
don leat gáigi
… ja de dát dikta lei heahkkadahkii márfema ja soames gáiggá birra! Maid ihken?!?!
Dahje ná, dál galggan čállit divtta iežan birra:
Mon lean Ánná Káisá
Do lea stuorra gáisá
Doppe orro stállu
mas lea guhkes gállu
HÆ, dat dikta han galggai MU birra, ja dál soames guhkesgállut stállu ja stuorra gáisá leat suoladan olles divtta!!!!
Lean guhka imástallan man birra galggan nuppadis bloggestit. Ikte ledjen mu boares dihtora skurbemin. Dalle gávdnen dán divtta man čállen oktii áigá suohttasa dihte. Ja dán dihte álgen jurdilit sámegiel riimmaid ja diekkáriid. Hehe hui somás dikta iežan mielas. Dá dat lea:
Bijan sisa dán gova álggus, vai boahtibehtet rivttes millii
Biillain vuojašan
telefuvnna haga
Skearruid čuojahan
Fáhkkestaga
juvllat bávkalit
mohtor jápmá
čuovggat jávkalit
gasku skápma
Seavdnjadasas
Čuovggan riššain
Biilalásas
olmmoš liššáin
“Bures,” ravkala,
“gosa galggat?”
De son savkala:
“oađe njalggat!”
Bijan vel sisa balddihahtti gova dehke, vai ipmirdehpet divtta poenga.
Ååå hearran sivdnik mon ledjen ballamin jámas go ohcen govaid bidjat bloggii. Man ihána holu issoras govat ledje. Ja dál go čálán dán diibmu lea heret akta (in oaččo nahkáriid) JA DE go ledjen geahččamin govaid de gullui dego mu lásii skoalkalii! Veahket!
Muhto goit, dát dikta ii livčče dárbbašan nu issorassan, muhto go juo dat biilavuoddji álggii čuovgat riššain, de ii lean vejolaš ahte son oinnii mange eará go olbmo liššain, amma nu!
Mu boađus, jos giige dán imástallá: sámegillii lea somá diktet, go don it die goassige govt geavvá!
Čállet sisa teavsttaid dege divttaid midjiide, olbmot!
Aaaa mus lea buorre jurdda! Čále sisa man birra galggan diktestit! Dikta ž3 (ž3=sámi <3)
Manne álgen ohcat daid govaid, in jáhke ahte beasan nohkkat dán ija.
Dearv. Ánná Káisá, boahtteáiggi poehtanásti
På norsk: Jeg funderer og demonstrer hvor gøy det er å skrive rim på samisk. (Diktenerd)
samasblogg.wordpress.com 