Sárá Márjá lea sádden midjiide geassemuittuid

Mu geassi

Dán geasi mun fitnen lieggariikkas. Mun in leat leamašan olgoriikkas dan rájes go mun lekken unna nieiddaš, ja dal lean 20 jagi. Dan háve ii lean ge eadni mielde, muhto mii leimmat njealjis mátkkošteamen. Mun, irgán, mu buoremus skibir ja su irgi. Álggus go vulggiimet Álttás, de fertiimet vuordit Ušllus sullii 10 tiimmu. Idja lei guhkki, go mus eai rohtten nahkárat.

Mii leimmat vuolgán Gran Canariai, ovtta báikái man namma lea Playa Del Ingles. Dan báikki leimmat mii oaidnán TV:s “Chaterfeber”is. Doppe lei mis fiinna dillii. Mii finaimet gávpogis shoppemin, laggodeamen ja beaivváža navddašeimmet. Oruimet doppe 14 beaivve. Leimmat hui lihkkus dainna dálkkiin, go ii lean measta obage obba dálki.

Go mii fas jorggiheimmet ruovttuguvlui, de lei veaháš áhkkit guođđit Spania, muhto seammás buorre diehtit ahte leimmat ruoktut jođus. Oslos mii šattaimet vuordit sullii 8 tiimmu ovdal de fas girdileimmet Áltái. Mis lei fiinna tuvrra ja illudan jo dassažii mun lean boahtte háve lieggariikii jođus.

_________________________________________

Sáddestehket midjiide čállosiid. Dán mánu don sáhtát oažžut Sámásmuinna-gáhpira jos čálát “geassi 2014” birra.