Hallå blogga! Otná hástalusat:

Odne galgen vázzit sisa olgouvssa soames teáhterii dáppe Ušllus. Galgen bileahtaid oastit sámi teáhterbihttái mii boahtá Ušlui heret. Sápmelaš han verte oainnát álo mannat juohke sámi diŋgii mii dáhpáhuvvá, háliideaš go vai ii. Muhto mon dieđusge háliidan!
Lei issoras harvedálki. Diekkár arvedálki ahte njuoskat čađa juohke busses mii vuodjá du meaddil (gávpotváttisvuođat).

Goitge, mannen diet teáhterii. Bohten vázze uvssa vuoste, mannen sisa, de dat dáhpáhuvai. Mon darvánin! Ledjen dego čatnon gitta, in beassan ovttos, in siiduide. Gehččen birra heađis, mii dáhpáhuvái, mii dat lei noaidegoansttaid? Bivastagat golgagohte, vertejin go dasa bissut agi beaivái??? De fuobmájin.

Mon lean dál orron gávpogis máŋga jagi, muhto mu mielas mon in leat goassege leamaš makkárge gávpotnieida. Ovdal dál; lean ožžon paraplya. Muhto dat ii leat álo nu álki muitit sutnje gii lea álo dušše geavahan harvereadju, don dieđát, diet sámi over-size harvejáhka maid mii geavahit duoddaris, gávppis, feasttas ja gos ihkin.

Dat mii lei dáhpáhuvvan lei …åhh man heahpat… ahte ledjen olát healban ahte mus lei paraplya, ja vázzen njuolga sisa uksaráigge dego álo lean ovdal dahkan. Ja maid de, dieđusge dat darvánii. Go dán muiten, mon hui boagustišgohten, ja de vertejin beare jorggihit, čákŋat arvesuoji vuollái ja váldit dan vulos, vai bessen luvvet dan ja joatkit sisa.

Vearrámus lei, ahte mu duogábealde uvssas ledje golbma-njeallje hui “coolas” mu ahkásaš hipsterbártnit mat gaifáje munnje stuorra čalmmiiguin, ja váikko mon ledjen ieš okto reaškimin de sii eai oba ge moddján. Ja dego DÁT ii lean doarvái, de mus ledje gápmagat nalde, vuoddagiiguin ja visot! Juohkehaš oinnii ahte diet jallor lea sápmelaš. Lea go imáras ahte olbmuin leat ovdagáttut?

Ja das nogai muitalus sápmelačča birra gii lei ožžon paraplya. Reašk reašk reašk!

Ps. Ušlu-sápmelaččat geat dán lohket, mannet dakkaviđe oastit bileahta sámi teáhterii mii boahtá heret. Dušše okta sadji lea váldon, vuosttáš ráiddus, doppe mon čohkkan.
Pss. Muitibehket sáddet sisa din čállosiid midjiide! Mánnosaš fádda lea hain “Geassi 2014” (lea veahá guhkit go blogga lea juste álgán).

Kort oppsummering på norsk: Jeg har fått paraply. Hva blir det neste? Husk å sende inn deres sommerminner.

– Ánná Káisá