Erenomáš röntgenapparáhtta dárbbahuvvo
Mammongráfa dahkko dávjá mammongráfaovttadagas, mii sáhttá leahkit sierra dehe buohccevies u röntgenossodaga oktavuođas. Dutkamuš dahkko maid sierra raddevuostáváldimiin ja dihto dearvvašvuođaguovddážiin.
Dat röntgenapparáhtta mii gevtojuvvo lea erenomážit hábmejuvvon vai sáhttá addit buriid govaid raddegođđosis gehpes röntgensuonjardeami vehkiin. Dihto dáhpáhusain sáhttet boraššattalmasat mat leat beare moadde millimettara stuoru áicojuvvot.
Ná dat dáhpáhuvvá
Ii dárbbat ráhkkanit mange sierra ládje. Álggos oažžu vástidit moatti jearaldahkii ja muitalit jus leat leamaš váivvit rattiin, dehe jus borrá dálkasiid mat siskkildit hormonaid. Oažžu nuollat bajit oasi gorudis ja buohccidivššár geahččá rattiid ja merke jus leat oinnolaš rievdamat, ovdamearkka dihte riegádanmearkkat dehe árbbit ovddit čuohpademiin. Dat soitet oidnot röntgengovain ja dulkojuvvot boastut borašdávdašattalmassan.
Dasto oažžu mannat röntgenapparáhta lusa ja čuožžut dan ovddas. Raddi gearddiinis bidjo pláhta nala mii siskkilda govvadetektora. Raddi njuvdojuvvo dasto čoahkkái čađačuovgi pláhtain mii deddojuvvo ratti vuostá. Gieđa ferte doallat badjin ja vuoiŋŋastahttit apparáhta vuostá dan bottago guokte golbma gova váldojuvvot. Lea dehálaš čuožžut siivvuid. Dasto dahkko seamma ládje nuppiin rattiin. Olles dutkamii gollá 15-30 minuhta, ieš govaváldimii 5- 10 minuhta.
Mot mammongráfa dovdo?
Sáhttá dovdot unohas dehe bávččagahttit oanehis botta go raddi deddojuvvo čoahkkái. Muhto dat ferte dahkkot, daningo govva oažžu buoret kvalitehta ja dutkan šaddá sihkkareabbon. Dan lassin sáhttá gevtot vuollegit suonjardosa go jus raddi ii livččii deddojuvvon čoahkkái.
Muhtumin oažžu boahtit ruovttoluotta
Dávjjimustá leat guokte doaktára geat beroškeahttá nuppiideaskka árvvoštallaba mammongráfagovaid. Dat lasida árvvoštallama sihkkarvuođa. Jus soai áicaba juoidá mii ii oro leahkime nu go galgá, bovdejuvvo ruovttoluotta ođđa dutkamii. Dalle váldojuvvo lasse mammongráfagovat ja dalle dutkojuvvo dávjá maid Ultra-jienain.
Doavttir sáhttá maid váldit iskosa rievdamis. Jus lea beare una rievdan mii lea váttis dovdat iskkus sáhttá váldot ođđa mámmongráfain dehe Ultra-jiena vehkiin. Fiinna nállu čuggejuvvo rievdamii ja seallaiskkus njammojuvvo olggos. Iskkus sáddejuvvo mikroskohpalaš dutkamii. Buot dát dahkko sihkkarastin dihte ahte ii leat borašdávda.
Vástádus mámmongráfadutkamis sáddejuvvo njuolga ruoktot guovtti vahku siste dasgo lea bovdejuvvon dearvvašvuođa dárkkisteapmái. Jus lea vuolggahuvvon mammongráfii oažžu dieđu dutkanbohtosis iežas doaktáris.
Hormonadikšun sáhttá dahkat árvvoštallama váddáseabbon
Muhtin nissonat ožžot hormonadikšuma jorggáldatjagiid áigge dehe maŋŋel dehe go borret p-billara. Dakkár dikšun váikkuha raddegođđosii nu ahte dat šaddá diktábun mii dagaha mammongráfagovaid váddáseabbon árvvoštallat. Danin lea dehálaš muitalit jus borrá dálkasiid mat siskkildit hormonaid.
Dutkan ii leat váralaš
Dat suonjarmearri masa šaddá mammongráfadutkamis lea nu unni ahte dat ii buvtte mangelágán riskkaid. Ja dáhpáhuvvá jámma teknihkalaš ovdáneapmi dárkkuhussan unnidit suonjardosaid vel eanet. Ii galgga biehttalit mannamis mammongráfadutkamii go bovdejuvvo, dehe jus lea áican rievdama iežas rattis.
Mammongráfain sáhttá dutkat vaikko olbmos lea raddeimplantahtta. Ii leat mangelágán riska ahte implantáhtta cuovkana, muhto go dalle ii sáhte deaddit rattiid čoahkkái dego nissoniin implantáhtahaga sáhttá dárbbahuvvot individuálalažžat heivehuvvon dutkan. Dávjjimusat kompletterejuvvo maid mammongráfa ahte rattit guldaluvvo čađa ja dutkojuvvo Ultra- jienain.
Gean ii galgga dutkojuvvot mammongráfain?
Go lea hui nuorra lávejuvvo dutkat Ultra-jienain mammongráfa sajis. Dat vuolgá das go raksagoađus lea nu divttis ahte mammongráfagovaid lea váttis dulkot. Ultra-jietna addá dalle sihkkarit vástádusa.
Jus doavttir vihku ahte rattis lea bohtaneapmi dalle lávejuvvo mammongráfa garvit daningo lea biidnu deaddit ratti čoahkkái. Dan sajis sáhttá leahkit buorre čađahit Ultra-jietnadutkama, oaidnin dihte leago siedja man dárbbaha bohčit olggos. Go infekšuvdna lea dikšojuvvon galgá goittotge čađahit mammongráfa. Dat lea erenomáš dehálaš jus lea boarrásit.
Jus lea áhpeheapme ii gálgga čađahit dearvvašvuođadutkama, ng. screnen, mammongráfain. Muhto jus áicá rievdama rattis galgá álo váldit oktavuođa divššuin vai jođánit beassá dutkamii, vaikko lea áhpeheapme. Dalle dutkan álggahuvvo Ultra-jienain ja dievasmahtto mammongráfain jus dárbbašĺas.