ON` álgoálbmotáššiid spesiálaáittardeaddji mandáhttii gullá erenoamážit deattuhit álgoálbmotnissoniid ja -mánáid dilálašvuođaid. Ovdalaš spesiálaáittardeaddji James Anaya lea ovdan geassán guokte deaŧalaš olmmošvuoigatvuođaášši mat čuhcet álgoálbmogiidda, namalassii veahkaválddálašvuođa nissoniid ja nieiddaid vuostá, man sihke álgoálbmotdievddut ja olggobeali olbmot čađahit. Spesiálaáittardeaddji Victoria Tauli Corpuz lea máilmmiviidosaččat guorahallan álgoálbmotnissoniid ja -nieiddaid dilálašvuođaid, ja ovddidii 2015 čavčča sierra raportta dan birra. Konklušuvdna lea ahte álgoálbmotnissoniin lea erenoamáš riska gillát veahkaválddálašvuođa ja olu eará olmmošvuoigatvuođarihkkumiid.

Guovvamánus 2016 leat mii oaidnán guokte ovdamearkka dasa ahte olmmošvuoigatvuođarihkkumat álgoálbmotnissoniid vuostá váldojuvvojit duođas. Guatemálas mieđihuvvui ahte álgoálbmotnissonat leat gillán roavva olmmošvuoigatvuođarihkkumiid militearaleairras Sepur Zarco áigodagas 1982 rájes 1988 rádjái. Ovdalaš offiseara ja militearkommissára dubmehalaiga systemáhtalaš seksuála veahkaválddi, illásteami, šlávaid doallama, jávkademiid ja goddimiid ovddas. Ja guovvamánus 2016 almmuhii Kanada ráđđehus ahte sii leat álggahan proseassa man ulbmil lea guorahallat dan go birrasiid 1200 álgoálbmotnissona ja -nieidda leat jávkan dahje gottáhallan maŋemus 30 jagis.

ON` nissonkommišuvdna

Njukčamánu 14. – 24. beivviid 2016 doallá ON` nissonkommišuvdna fas jahkásaš čoahkkima New Yorkas. Dát lea deaŧalaš riikkaidgaskasaš gávnnadanbáiki gos nissonolbmuid vuoigatvuođat ja dásseárvu digaštallojuvvojit. Buotlágan veahkaváldi nissonolbmuid ja nieiddaid vuostá lea guovddáš áššin čoahkkimis, ja ON` nissonkommišuvdna lea maiddái sierra guorahallan álgoálbmotnissonolbmuid dilálašvuođa dán dáfus.

Norga lea sádden iežas 8. raportta ON` nissonkommišuvdnii 2010:s. Ođđa raporta sáddejuvvo 2016:s.