Gáldu háliida oassin Norgga našunála olmmošvuoigatvuođaguovddážii
Gáldu stivra bivdá ahte Gáldu beassá oassin Norgga ođđa Našunála olmmošvuoigatvuođaguovddážii (NIM). Gáldu stivrajođiheaddji ja direktevra leaba ožžon fápmudusaid joatkit oktiičaskinbargguin.
Norgga Našunála olmmošvuoigatguovddáš (NIM) ásahuvvui diibmá (2015) ja lea ásahuvvon Stuoradikki vuollái. Gáldu lei juo ovdal go NIM ásahuvvui dieđihan ahte háliidit árvvoštallat šaddat dakkár guovddážii oassin jus dakkár ásahuvvo. Oktiičaskin lea dál formálalaččat mearriduvvon Gáldu stivrras ja lea jáhkku ahte dat sáhttá dáhpáhuvvat juo dán jagi (2016).
Nannosit sajádat ja viidát mandáhtta
Gáldu lea álggu rájes oaivvildan ahte Gáldu sajádat nannejuvvošii jus beassá oassin našunála olmmošvuoigatvuođaguovddážii. Danne lea Gáldu stivra juo jagi 2013 `s dieđihan ahte háliida oassin ođđa ásahussii.
– Mii gal oaidnit dán lunddolaš lávkin viidáset ja dárbbašlažžan vai nannet barggu ovddidit ja vákšut sámi olmmošvuoigatvuođaid, mat leat oassin NIM ovddasvástádussuorggis, dadjá Gáldu stivrajođiheaddji Ing-Lill Pavalla.
Vákšun ii leat leamaš oassin Gáldu mandáhtas ovdal ja šaddá ođđa suorgi Gáldui.
Bissot Guovdageainnus
Gáldu stivrra mearrádusas leat eaktun ahte Gáldu šaddá sierra ossodahkan olmmošvuoigatvuođaguovddážis ja ahte bissu Guovdageainnus:
– Gáldu stivrii lea dehálaš ahte Gáldu, maiddái oassin ođđa guovddážis, bissu Guovdageainnus sierra ossodahkan, doalahan dihtii oktavuođa sámi servvodagain nu ain doalahit luohttámuša ja legitimitehta sápmelaččaid gaskkas, čilge stivrajođiheaddji Pavall ja joatká:
– Gáldu bargiid boahtteáigi lea maid dehálaš stivrii, lea dehálaš doalahit sámi kultuvra- ja giellagelbbolašvuođa mii otne lea Gáldus. Lagasvuohta sámi servvodahkii, geaid ovddas NIM maid galgá bargat, lea maid dehálaš stivrii.
Mearriduvvo loahpalaččat Stuoradikkis
NIM stivra galgá dál meannudit ja doaimmahit oktiičaskima viidáset ovttas Stuorradikkiin. Praktihkalaš oktiičaskin eaktuda positiiva ja loahpalaš mearrádusa Stuoradikkis, nu ahte váldá vel veahá áiggi ovdal oktiičaskin sáhttá čađahuvvot loahpalaččat. NIM lea Oslos ja lea Petter Wille gii dan jođiha. Son oaččui jođihanbarggu jagi 2015. Dan birra sáhtát eanet lohkat dáppe:
Gáldu sávvá lihkku Petter Wille
Dáppe gávnnát eanet dieđuid Gáldu birra ja dáppe fas NIM birra.
Jus háliidat eanet lohkat movt dat ođđa našunála olmmošvuoigatvuođaguovddáš (NIM) ásahuvvui ja Stuoradikki meannudeami birra ásaheamis, de gávnnat dan birra dieđuid dáppe.
