- Mii geat bargat Gáldus, álgoálbmotvuoigatvuođaiguin, beassat dál oassin stuorat fágabirrasis, mii bargá ovddidit ja nannet olmmošvuoigatvuođaid ja daid čađaheami Norggas, dadjá Gáldu direktevra Laila Susanne Vars. Son joatká:

- Mii gal oaivvildit ahte midjiide sámi fágabirasin lea ávkkálaš šaddat oassin stuorat fágabirrasis. Seammás lea mis maid olu máhttu ja gelbbolašvuohta mii boahtá ávkin dál go NIM galgá leat eanet oidnosis ja galgá eanet systemáhtalaččat bargat ovddidit ja nannet álgoálbmogiid ja minoritehtaid olmmošvuoigatvuođaid.

NIM direktevra Petter Wille lea maid duhtavaš:

- Lea illudahti mearrádus, mii addá buori vejolašvuođa olmmošvuoigatvuođaguovddážii váldet dehálaš rolla sámeriekte- ja álgoálbmotriektegažaldagaiguin, lohká son.

Boahtá ovdan Norgga našunála olmmošvuoigatvuođaguovddáža láhkaovdabargguin (Innst. 216 L (2014-2015)) ahte álgoálbmotrievttit maid galget leat dehálaš oassin guovddáža doaimmas. Eaktuduvvo maid ahte ođđa našunála guovddážis galgá leat buoret vejolašvuohta čuovvulit sámi rivttiid go ovddit našunála guovddážis.

Leage dán vuođul ahte Gáldu stivra juo 2013`s celkkii ahte Gáldu galggašii šaddat oassin dakkár guovddážis, jus ja go dat ásahuvvo. Gáldus leat guhtta bargi ja sin bargosadji boahtá ain leat Diehtosiiddas, Guovdageainnus. Gáldu bargit ja kantuvrasadji lea maid leamaš dehálaš Gáldu stivrii proseassas mii buvttii otná mearrádusa.

Oktiičaskin mearriduvvui oassin Stuoradikki meannudeamis 2017 stáhtabušeahtas, mas NIM ruhtadeapmi lassána 9,7 miljovnnas (2016) gitta 20,6 miljovdnii (2017), earret eará danne go Gáldu ruhtadeapmi sirdo departemeanttain olmmošvuoigatvuođaguovddážii. Gáldu lea ožžon ruhtadeami stáhtabušeahtas, eanas Gieldda- ja ođasmahttindepartemeanttas, 5,6 miljovnna 2016. 2,28 miljovnna dán supmis boahtá Olgoriikadepartemeanttas (2016).