Gáldu ovttasbargágoahtá Asia álgoálbmotservviin
Gáldu – Álgoálbmotvuoigatvuođaid Guovddáš lea bovden Asia álgoálbmogiid oktasašsearvvi Asia Indigenous Peoples Pact (AIPP) Guovdageidnui álggahandihte ovttasbarggu. AIPP bealis leat dál guokte ovddasteaddji boahtan Guovdageidnui deaivvadit Gálduin. Sii leat Sámis golggotmánu 13. beaivvi rájes gitta 16. rádjai.
Gáldu – Álgoálbmotvuoigatvuođaid Guovddáš lea bovden Asia álgoálbmogiid oktasašsearvvi Asia Indigenous Peoples Pact (AIPP) Guovdageidnui álggahandihte ovttasbarggu. AIPP lea hui nanu álgoálbmotorganisašuvdna mii lea olu jagiid jo bargan álgoálbmotvuoigatvuođaid nannemiin riikaidgaskasaččat.
Asia Indigenous Peoples Pact (AIPP) lea regiovnnalaš searvi mii álggahuvvui 1988s. Sis leat juste dál 47 mielláhttosearvvi 14 iešguđetge riikas Asias. Sin searvi lea organiserejuvvon nu ahte sis leat 14 bajitdási searvvi, 15 guovlludási searvvi ja 18 báikkálaš searvvi láhttun. 6 searvvi leat álgoálbmotnissoniid searvvit ja 4 fas sierra nuoraid searvvit.
AIPP sáttagotti jođiha Joan Carling gii lea váldočálli/jođiheaddji AIPPs ja guhte lea vel ON Bistevaš ÁlgoálbmotForuma áššedovdi láhttu.
- Gáldu lea bovden AIPP ovttasbargui go mii oaidnit ahte sii barget erenoamaš buori barggu. Sii leat ráhkadan olu diehtojuohkinbuktagiid ja filmmáid maid mii hálidivččiimet heivehit nu ahte dat sáhttet geavahuvvot skuvllain dáppe Sámis. Gáldu hálida ovttasbarggu boahtteáiggis gos mii fárrolagaid nannet diehtojuohkima sámi ja álgoálbmotvuoigatvuođaid birra, dadjá Gáldu direktevra Láilá Susanne Vars.
