GÁLDU ovttastahttojuvvo Norgga nášunála olmmošvuoigatvuođaguovddážin
Ráđđehus evttoha 2017 jagi stádabušeahttaárvalusas ahte GÁLDU – Álgoálbmotvuoigatvuođaid Gelbbolašvuođaguovddáš ovttastahttojuvvo Norgga Našunála Olmmošvuoigatvuođaguovddážin (NIM).
Dakko bokte sirdojuvvojit buot GÁLDU bargit ja olles GÁLDU doaibma NIM vuollai 1.1.2017 rájes. Bargosajit Guovdageainnus bisuhuvvojit.
- Lean ilus go ráđđehus dál evttoha ahte GÁLDU ja min bargit dál sirdojuvvot NIM:ii ja dakko bokte nannejuvvo NIM gelbbolašvuohta sámi ja álgoálbmotáššiin, muhto dát váikkuha maid dasa ahte bargu álgoálbmotvuoigatvuođaid čađahemiin riikadásis nannejuvvo. Dasa lea dárbu ja lea illudahtti ahte ráđđehus oaidná dán dárbbu, dadjá GÁLDU direktevra Laila Susanne Vars.
Gáldus fágabiras maid NIM dárbbaša
Stuoradiggi lea eaktudan ahte Sámi/álgoálbmotvuoigatvuođaid suorgi galgá vuoruhuvvot NIM:as, ja dat leage váldoágga manne GÁLDU dál šaddá oassin NIM:as go GÁLDUs lea fágabiras juste vuoigatvuođasuorggis mii dárbbašuvvo NIM:as. Gieldda- ja ođasmahttindepartemeanta ja Olgoriikadepartemeanta ruhtadeaba GÁLDU doaimmaid. Dát juolludeamit sirdojuvvojit vuordimis NIM:ii boahtte jagi go Stuoradiggi geargá meannudeamen bušeahta. Gáldu direktevra Laila Susanne Vars deattuha ahte ođđa sajádat Stuoradikki ásahusas addá ođđa vejolašvuođaid čalmmustahttet sámi vuoigatvuođaáššiid ja gozihit ahte sámiid olmmošvuoigatvuođat duohtandahkkojuvvojit Norggas. NIM galgá earret eará vákšut Stuoradikki ja Ráđđehusa mearrádusaid ja buktit iešguđet eiseválddiide rávvagiid mot nannet olmmošvuoigatvuođat čađaheami Norggas.
Proseassa álgán 2013s
GÁLDU ásahuvvui 2002 nannen dihte diehtojuohkima álgoálbmotvuoigatvuođaid ja sámi vuoigatvuođaid birra Norgga servvodagas. 2013:is mearridii GÁLDU stivra ahte GÁLDU berre šaddat oassin Norgga Olmmošvuoigatvuođaguovddážii. Loga dan birra eanet dáppe. 2014:is deattuhii Norgga Stuoradiggi ahte Norgga ođđa olmmošvuoigatvuođaásahus galgá vuoruhit álgoálbmotvuoigatvuođa suorggi, ja dan oktavuođas doarjjui Stuoradiggi jurdaga ahte GÁLDU berre šaddat oassin NIM:as. Sámeministtar Jan Tore Sanner doarjjui maid ahte GÁLDU sirdojuvvo Gieldda- ja Ođasmahttindepartemeanttas NIM:ii mii lea Stuoradikki vuollásaš ásahus.
Dáppe gávnnát ráđđehusa evttohusa.
Oktavuođaolmmoš: GÁLDU direktevra Laila Susanne Vars, 977 54 102, laila@galdu.no
