Ante Bals ii dárbbaš lávket galle lávkki dál go lonuha bargoaddi. Son guođđá peršunalhoavdda virggi Sámi allaskuvllas, ja sirdá Gáldu kántuvrraide nuppe bealde feaskára go njukčamánus álgá operatiiva doaimmaheaddjin Gáldus.

Gelddolaš bargu

- Lea gui gelddolaš álgit Gáldui. Mu duogáš oahppoásáhusas, medias ja politihkkas lea váikkuhan dasa ahte doaimmaheaddjirolla ja gulahallan obalaččat geasuha mu, lohká Bals. Ja son lea ge bargan medias guhká, sihke journalisttan ja váldodoaimmaheaddjin. Lassin lea sus boazodoalloduogáš, lea bargan boazodoallohá husas ja maid stáhtačállin Jan Tore Sannera ovddas.

Sáhkkivuohta

Ieš jáhkká dán doaimmaheaddjivirggi heivet bures su lunddolaš sáhkkivuhtii.

- Gáldus beasan bargat fáttaiguin mat leat dagahan mu sáhkkin dan rájes go šadden rávisolmmožin, álggos lunddolaččat boazodoalu vuoigatvuođaid ja rivttiid dáfus. Journalistan fuomášin jođanit ahte seammaLun čuolmmat ja hástalusat gávdnojit buot sápmelaččaid ja nu maid álgoálbmogiid ektui. Dál oaččun vejolašvuođa eanet oahppat gelddolaš fáttaid birra ja daid dieđuid gaskkustit buohkaide geain lea dárbu

Ávkkálaš duogáš

Gáldu direktevra Laila Susanne Vars deattuha ge ahte Balsas lea máŋggabealát duogáš.

- Bealistan lean ilus go Ánte Bals lea dieđu addán ahte son álgá bargui Gáldui. Ántes lea nanu ja máŋggabealat duogáš, son dovdá bures sámi servvodaga. Dasa lassin lea sus maid doaimmaheaddjivásáhus mii sihkkarit boahtá leat ávkin midjiide Gáldus dál go mii leat ođastan min neahttasiidduid ja go mii leat nannegoahtán gulahallama min ulbmiljoavkkuiguin. Mun sávan Ántii bures boahtima Gáldui ja illudan suinna ovttasbargat, dadjá Gáldu direktevra Laila Susanne Vars.