Konsultašuvdnačoahkkin álgoálbmogiid oassálastima birra ON:s
Gaskavahkku 18.5 lei ON váldoguovddážis New Yorkas rabas konsultašuvdnačoahkkin álgoálbmogiid oassálastima birra ON:s. Gažaldat lea movt álgoálbmogat galget beassat searvat ON:s seamma ládje go stáhtat ovddidan dihte iežaset vuoigatvuođaid. Čoahkkin dollojuvvon ON váldoguovddážis New Yorkas Álgoálbmot Bistevaš Foruma čoahkkima oktavuođas.
Álgoálbmogiid oassálastin ON:s lea Máilmmikonferánssa loahppadokumeanta (WCIP 2014) čuovvoleapmi. Dán loahppadokumeanttas geatnegahttet stáhtat árvvoštallat movt álgoálbmotovddasteaddjit buot guovlluin máilmmis sáhttet oassálastit relevánta ON proseassaide mat leat fátmmasteaddji ja mas álgoálbmogat ožžot buot dieđuid mat leat dárbbašlaččat.
Lea ON váldočoahkkima presideanta gii galgá čađahit dán barggu. Veahkkin alcces lea son nammadan guokte ráđđeaddi miellahttostáhtain: Kai Sauer (Suopma) ja Martha Ama Akyaa Pobee (Ghana), ja guokte álgoálbmotráđđeaddi: Dr. Claire Winfield Ngamihi Charters (Jaskesábi guovlu) ja Dr. James Anaya (Davvi-Amerihkká guovlu). Dát ráđđeaddit galget veahkehit presideantta konsultašuvnnaiguin.
Okta guovddáš gažaldagain lea movt álgoálbmotparlameanttat ja eará ovddasteaddji álbmotválljejuvvon álgoálbmotorgánat galget sáhttit ovddastit iežaset ON:s sierra kategoriijain. Otne fertejit álgoálbmotparlameanttat searvat juogo NGO kategoriija vuolde, dahje sii fertejit searvat stáhtadelegašuvnna mielde. Dát hehtte álgoálbmogiid oassálastima mearrádusproseassaide ON:s main lea stuora váikkuhus álgoálbmogiid vuoigatvuođaide ja sin boahtteáigái. Seammás ferte vuhtii váldit ahte dál leat álgoálbmogat organiseren iežaset hui máŋgga ládje, eaige leat nu máŋga álgoálbmoga geain lea álbmotválljejuvvon orgána mii sáhttá ovddastit álbmoga.
Konsulterenčoahkkima sáhtát maid geahččat ON tv neahttasiidduin. - Konsulterenčoahkkin 18.5.16
Miellahttoriikkat galget meannudit dán ášši ON váldočoahkkima čiežalogát čoagganeamis čakčamánus 2016:s.
Ovdal dan galgá leat vel okta konsulterenčoahkkin geassemánu loahpas, ovdal go presideanta buktá iežas loahpalaš evttohusa Geneves suoidnemánus dán jagi. Dan almmuhuvvo Álgoálbmogiid vuoigatvuođa ekspeartamekanisma čoagganeamis suoidnemánus Geneves.
Eambbo dieđuid proseassa birra gávnnat dáppe.
Čoahkkimis New Yorkas ledje máŋga álgoálbmoga ja stáhta geat bukte iežaset oaivila dán áššis. Dát leat čohkken muhtin cealkámušaid:
- Árktalaš álgoálbmotjoavkku cealkámuš
-Ruonáeatnama ruovttustivrra cealkámuš
- Oktasaš cealkámus Norggas, Suomas, Ruoŧas, Dánmárkkus, Estonias, Litauenis, Islánddas ja Ungárnas
