Adjektiivvat

Adjektiivva muitala mo dahje makkár juoga dahje gii nu lea, omd. Mus lea 'rukses' biila. Son lea 'lihkolaš'.

Adjektiivvaid sojaheapmi lea das gitta galle stávvala leat máŋggaidlogus. Gávdnojit

bárrastávvaladjektiivvat, omd. nuorra - nuorat.
bárahisstávvaladjektiivvat, omd. suohtas - suohttasat, bivnnut - bivnnuhat.
kontrakšuvdnaadjektiivvat, omd. njálggis - njálgát, stuoris - stuorrát.

Fuobmá ahte diftoŋga sáhttá njuolgat ja ahte lea dássemolsašuddan.

Adjektiivvas lea attribuhttahápmi go lea ovddabeale substantiivva: Sis lea 'fiskes' viessu. Go adjektiiva lea substantiivva maŋábealde, de dat lea predikatiivahámis : Viessu lea 'fiskat'. Viesut leat 'fiskadat'.

Adjektiivvaid sáhttá veardidit (kompareret), ja dain leat golbma veardidanhámi: unni - unnit - unnimus.

Adjektiivva sáhttá geavahit substantiivan ja dat sojahuvvo dalle buot kásusiid mielde. Kásus čájeha makkár doaibma adjektiivvas lea cealkagis. Davvisámegielas leat 7 kásusa. Sojahanminsttar lea seammá go substantiivvain.

Nominatiiva lea vuođđohápmi (sátnegirjehápmi), omd. Nieida lea 'nuorra'.
Akkusatiiva čájeha ahte sátni lea objeakta, omd. Mun oasttán 'hálbbibu'.
Genetiiva čájeha mii dahje gii lea oamasteaddji: riggá - riggáid (rikkis) . Kásus geavahuvvo maid post- ja preposišuvnna oktavuođas, omd. 'Jallaid' gaskkas lei jierbmái.
Illatiiva čájeha dábálaččat lihkadeami masa dahje geasa nu: Mun adden eanet vahkkoruđa 'boarrásebbui'. Dát lea fálaldat 'riggáide'.
Lokatiiva muitala ahte juoga lea báikkis dahje vuolgá báikkis eret. Kásus sáhttá maid muitalit oamasteami: 'Jallas' ii leat ollu jierbmi. Sii soitet oažžut veahki 'riggáin'.
Komitatiiva čájeha ahte juoga dahkko mainna dahje geainna nu: Mun hupmen muhtun 'jallain'.
Essiiva dili dahje iešvuođa birra. Kásus muitala maid ahte juoga adnojuvvo dahje gohčoduvvo manin nu. Omd. Mun dovden iežan 'jallan'.

Dás sáhtát lohkat eanet adjektiivvaid birra .

Ruovttoluotta grammatihkka váldosiidui.