Mo bargat VISL cealkkamuorain

Mii leat čohkken máŋgga gáldus cealkagiid maid leat fas heivehan, ja de leat daid analyseren. Sátneluohkáid ja funkšuvnnaid oanádusat sáhttet álggos leat apmasat geavaheddjiide, muhto VISL-siidduid oanádusat fertejit leat seammáláganat buot gielaide. Badjelaš duhát cealkaga geavahuvvojit sihke spealuin, Killerfilleris ja cealkkamurrii. Dát cealkagat leat juhkkojuvvon golmma čoakkáldahkii nu ahte sáhtát álgit álkkimus cealkagiiguin. Dasa lassin leat su 640 cealkaga dušše Killerfillera várás. Dain lea morfologiija heivehuvvon dan geavahussii.

Don deaddilat liŋkka VISL-cealkkamurrii. Deaddil čoakkáldaga (dási) maid háliidat, ja de oainnát čoakkáldaga cealkkašlájaid. Go leat válljen makkár cealkkašlája háliidat, de deaddilat dan, ja de oainnát cealkagiid. Cealkagiid gurut bealde lea unna govus, nugo govas:

Go deaddilat govvosa, de rahpasa siidu válljejuvvon cealkagiin. Don sáhtát válljet háliidat go oaidnit válmmaš cealkkamuora vai háliidatgo ieš hukset dan.

Muoras lea cealkkalahtuid (nugo subjeavtta, verbála jnv.) duogášivdni ruoná. Sátneluohkáid (nugo substantiivva, vearbba jnv.) duogášivdni lea alit. Cealkkalahtuid oanádusain leat eanaš stuorra bustávat, sátneluohkáid oanádusain leat dušše unna bustávat. Don berrešit lohkat sátneluohkáid oanádusaid ja cealkkalahtuid oanádusaid ja funkšuvnnaid.

Bajimusas cealkkamuorrasiiddus lea ruoná linnjá mas oainnát buot cealkkaosiid funkšuvnnaid. Alit linnjás leat buot hámit, sátneluohkát. Muhtun oanádusat sáhttet leat apmasat dutnje, muhto nu šaddá go oanádusat galget leat seammá juohke gielas. VISL váldogiella lea eŋgelasgiella, muhto don beasat oaidnit oanádusaid sisdoalu sámegillii jus bijat sáhpánnjuola eŋgelasgiel sáni ala. Sáhttá gánnáhit čálihit oanáduslisttuid báhpárii ja bidjat dihtora báldii, dalle go barggat VISLin.

Jus don háliidat oaidnit válmmaš muora mas leat merkejuvvon sihke sátneluohkát ja syntávssalaš funkšuvnnat, de deaddilat "Expand Tree" gurut ravddas. Dahje don sáhtát deaddilit ivdnekássa (omd. STA/cl) ja dalle oainnát cealkkalahtuid. Jus leat gihppu (g), paratáksa (par) dahje oalgecealkka (cl), de sáhtát daid maid deaddilit oaidnit makkár sánit dahje cealkkalahtut gullet daidda fas.

"Display"-menyas bajimusas don sáhtát válljet ahte dušše sátneluohkát ja gihput oidnojit ("Form only"), dahje ahte dušše funkšuvnnat oidnojit ("Function only"). Seammá menyas sáhtát válljet hálidatgo dieđuid badjálaga vai bálddalaga.

Dás oainnát válmmáš cealkkamuora:

Jus ieš háliidat hukset muora, de válljet "Build Tree" mii lea Tools-menyas. Dalle boahtá ođđa menya oidnosii gurut ravddas.

Don galggat dál bidjat sátneluohkáid ja cealkkalahtuid rivttes sadjái nu johtilit go sáhtát. Don deaddilat vuos oanádusa ruoná dahje alit linnjás, ja de deaddilat rivttes kássa. Jus don leat bargan riekta, de boahtá oanádus oidnosii, ja don sáhtát joatkit eará sániin. Jus leat bargan boasttut, de sáhtát iskat nuppádis.

Don sáhtát dahkat álkibun alccesat jus "Setting"-menyas válljet "Teaching environment", de "Symbols shown" ja de "Minor". Ruoná ja alit linnjás oidnojit dalle dušše oanádusat maid don dárbbašat cealkagii masa leat hukseme muora.

Muhtumin lea cealkkalahttu gihppu. Dalle fertet deaddilit daid kássaid mat du mielas gullet seammá gihppui. Kássat ožžot čáhppes rámma. De don ođđasit deaddilat "Combine Nodes". Jus don leat bargan riekta, de struktuvra boahtá oidnosii. Jus ii dáhpáhuva mihkkege, dalle don it leat bargan riekta. (Čáhppes rámma jávká jus don deaddilat kássa ođđasit, dahje don sáhtát deaddilit "Clear section".)

Jus dárbbašat veahki, de sáhtát deaddilit muhtun kássa, ja de "Show mother". Dahje don sáhtát deaddilit "Show structure", ja dalle boahtá olles muorrastruktuvra oidnosii.

Jus deaddilat ovtta kássa, ja de "Reveal Node", de bohtet dán kássa dieđut oidnosii. Jus vuollánat, de sáhtát deaddilit "Select All", ja de "Reveal Node", ja de bohtet buot sániid dieđut oidnosii.

• Sátneluohkáid birra
• Sátneluohkáid oanádusat
• Cealkkalahtuid funkšuvnnat
• Cealkkalahtuid oanádusat
• Evttohus progrešuvdnii vuođđoskuvllas ja joatkkaskuvllas
• Liŋka VISL cealkkamurrii