Konjunkšuvnnat

Bálddalasti konjunkšuvnnat čatnet seammalágan lađđasiid oktii:

Piera 'ja' Lemet leaba boahtán.
Mun oainnán 'sihke' Piera 'ja' Lemeha.
Mun lean sápmelaš, 'muhto' in máhte sámegiela.

Vuollálasti konjunkšuvnnat (subjunkšuvnnat) čatnet oalgecealkagiid váldocealkagii:

'Jus' asttan, 'de' boađán.
Iŋgá dadjá 'ahte' Elle boahtá.

Muhtun konjunkšuvnnain sáhttet leat máŋga mearkkašumi, omd. go. Muhtun konjunkšuvnnain lea sullii seammá mearkkašupmi, muhto geavahuvvojit iešguđetlágan oktavuođain. Omd. vai, -ge, dahje. Jearaldagas geavahuvvo vai, biehttaleaddji cealkagis lasihuvvo partihkal -ge verbii. Muđuid geavahuvvo dahje:

Mun boađán odne 'dahje' ihttin.
Boađátgo odne 'vai' ihttin?
In juga gáfe 'inge' deaja.
Jugan 'juogo' gáfe 'dahje' deaja.
Mun boađán 'go' asttan.
Mun boađán 'go' lean bovdejuvvon.
Mun boađán 'danne go/danin go /dainna go/dan dihte go/ lean bovdejuvvon.
Mun lean stuorát 'go' don.
Veahkehan du 'vai' gearggat.
Veahkehan du 'nu ahte' gearggat.
Veahkehan du 'vaikko' it dárbbašge veahki.
Don borat 'dego' spiidni.
Daga 'nugo' mun.

Konjunkšuvnna go sáhttá geavahit ovttas advearbbain ja postposišuvdnadajaldagain:

Mun boađán 'ovdal go' don vuolggát.
Mun boađán easkka 'maŋŋil go' don leat mannan.
Vuordde 'dassážii go' mun boađán.
Bargen leavssuid 'dan botta go' earát ođđe.
Vuolggán 'dalle go' gávppit rahpasit.
Lea guokte jagi 'dassái go' bohten Romsii.