Substantiiva
Sámegillii | På norsk | In English
lea nammasátni - olbmuid, elliid, dávviriid, proseassaid ja abstrákta dilálašvuođaid namma, omd: nieida, Káre, beavdi, ráhkisvuohta, dávda, Norga .
Sojahit substantiivvaid kásusiid mielde. Kásus lea sojahanhápmi mii čájeha makkár doaibma substantiivvas lea cealkagis. Davvisámegielas leat 7 kásusa:
- Nominatiiva - čájeha ahte nomen lea vuođđohámis (ovdanbuktinhámis): 'Gussa' lea olgun.
- Akkusatiiva - mii čájeha ahte sátni lea objeakta: Mun oasttán 'gusa'.
- Genetiiva - mii čájeha mii/gii lea oamasteaddji: 'gusa' juolgi.
- Illatiiva - mii dábálaččat čájeha lihkadeami masa nu: Mun attán biepmu 'gussii'.
- Lokatiiva - mii dábálaččat muitala ahte juoga lea báikkis/áđas dahje vuolgá báikkis/áđas eret: 'Gusas' oaččut mielkki.
- Komitatiiva - mii dábálaččat čájeha ahte juoga lea mainna dahje geainna nu: Mun bohten 'gusain'.
- Essiiva - mii muitala dili dahje iešvuođa birra: 'gussan'
Substantiivva sojaheapmi lea das gitta makkár mátta sánis lea. Mii geahččat galle stávvala leat sáni maŋimuš távttas máŋggaidlogus. Gielas leat
- bárrastávvalsubstantiivvat, omd. gussa - gusat, vilbealli - vilbealit,
- bárahisstávvalsubstantiivvat rieban - riebanat, nisu - nissonat ja
- kontrakšuvdnasubstantiivvat boazu - bohccot, bálggis - bálgát.
Fuobmá ahte diftoŋga sáhttá njuolgat ja ahte lea dássemolsašuddan.
Dás sáhtát lohkat eanet substantiivvaid birra .
Ruovttoluotta grammatihka váldosiidui.