#http://web.archive.org/web/20141014025536/http://klemetti.blogspot.fi/2012_10_14_archive.html

TORSTAI 18. LOKAKUUTA 2012

Suopma bázii gáddái

Dego vuordágis leinai, Suopma ii beassan ON:a dorvvolašvuohtaráđđái. Ovddit háve Suopma vikkai vásttolaš ON:a bargui 2000-logu álggus, goas dat beasainai ovtta jahkái jagiid 2006 – 2007 ON:a olmmošriekteráđi lahttoriikan. Daláš kampánnja áigge Suopma geavadis lohpidii ratifiseret Ilo 169-soahpamuša ja anii čatnaseamis ávkin kampánnjas. Ratifiserenlohpádus vajálduvai jođánit dan maŋŋel go olmmošriekteráđđebáiki joksojuvvui.

Maŋimus moadde jagi Suopma lea kampánnjeren ja bidjan hui olu sihke ekonomalaš ja politihkalaš deattu beassat ON:a dorvvolašvuohtaráđi molsašuddi lahttun. Plánat cohkkoje hui čielgasit otná jienasteamis. Dásseválddi presideanta Sauli Niinistö humai čakčamánu loahpas ON:a váldočoakkámis dorvvolašvuohtakampánnja oassin, ahte “Suopma oaidná iežas riikkaidgaskasaš servoša vásttolaš lahttun, muhtinlágán ávddalaš máilmmiriikkavuložin. Riikkamet doarju Ovttastuvvan Našuvnnaid sániiguin ja daguiguin, daningo dat lea min álbmotlaš beroštumi mielde.” Lohpádusain ii orron leame nohkka gokču. Suopma oaččui jur geasset Suoma olmmošriektedili goalmmát mearreáigegeahčadeamis ON:a olmmošriekteráđis ávžžuhusa ratifiseret ILO 169-soahpamuša.

Mun jáhkán, ahte Suoma ájahallan Ilo 169-soahpamuša ratifiseremis ja ovddit lohpádusat leat buore muddui váikkuhan dasa, ahte Suopma ii ožžon dárbahassii doarjaga dorvvolašvuohtaráđi lahttuvuhtii rahčamušainis fuolakeahttá. Orru leame nu, ahte Suoma hedjonan sajádat EU:s lea sáhttán váikkuhit bohtosii dego maid ráfidorvvasteami unnun ON:a operašuvnnain ja Suoma addin ovddidanveahki báhcin guhkás ON:a ulbmiliin. Suoma ollislaš jáhkehahttivuohta ON:a mállelahttoriikan ii leat leamaš dárbahassii buorre. Lea maid čielggas, ahte dorvvolašvuohtaráđđái lea garra bahkkehallan ja earenoamážit Suoma sturrosaš stáhta galgá leat iežas stuorit – ja eakti “máilmmiriikkavuloš”, mii maid lea deavdán ON:a geatnegasvuođaid.

Sávan goitge, ahte Suopma ii vajálduhte sávaldagas beassat ON.a dorvvolašvuohtaráđđái ja buoridit riikkaidgaskasaš jáhkehahttivuođas. Supmii livččii ávkkálaš guoddit ovddasvástádusa ON:a dorvvolašvuohtaráđis. Mu mielas Suomas leat buorit vejolašvuođat beassat dorvvolašvuohtaráđđái, jos Suopma ratifisere Ilo 169-soahpamuša ja doaibmá duođalaš bálggesčuollin olmmošrivttiid, ráfidorvvasteami ja utnolašvuođa ovddideamis. Jáhkán, ahte Suopma sáhttá oažžut juobe doarjaga sápmelaččain viggamuššásis beassat ON:a dorvvolašvuohtaráđđái, jos Suopma lea deavdán riikkaidgaskasaš geatnegasvuođaidis.