#http://web.archive.org/web/20150313004405/http://klemetti.blogspot.fi/2015_01_25_archive.html

SUNNUNTAI 25. TAMMIKUUTA 2015

Eará áigeguovdilis áššit
Sámediggi lea ožžon Leammi olbmuin ja fitnodateaiggádiin ávžžuhusa, ahte Leammi luonddustobu bálvalusat seillole dálá dilis. Mun lean leamaš oktavuođas Meahcceráđđehussii, vai áššis ordnejuvvolii deaivvadeapmi Meahcceráđđehusa, Leammi olbmuid ja Sámedikki gaskka.

Dán vahku mannen doallame sága Levis semináras, mii gieđahalai suvdilis ruvkedoaimma. Seminára deaddu lei ealáhusain ja ekonomiijas, eaige birasgáhttenolbmot lean bovdejuvvon obanassiige. Mu sáhka gávdno sámedikki ruovttusiidduin. Dán vahku Sámedikkis ja Eanodaga suohkanis ledje álgošiehtadallamat bieggavuoibmelávas, mii galgá ráhkaduvvot suohkana viidodahkii. Lávas meroštallojuvvojit dán muttos bieggavuoimmi várás heivvolaš guovllut ja nuppe dáfus dat guovllut, gosa bieggavuoibmi ii galgga lasihuvvot. Bieggavuoibmemillut ovddiduvvojit dán muttos lagamusat Giehtaruohttasa guvlui. Sámediggi gullá Giehtaruohttasa sápmelaččaid áššis ja čielggadišgoahtá láva vejolaš váikkuhusaid.

Loahpas vahku, bearjadaga, Sámi parlamentáralaš ráđi (SPR) stivra doalai čoakkámis Gironis. Áššelistu lei viiddis, ja dieđihanovddasvástádus lea ráđi ságadoallis, man dihte in gieđahala čoakkánáššiid dađi viiddibut. SPR:a  jođiheapmi sirdása guovvamánu bealde Suoma sámediggái. Sámediggi lea ožžon lassiruhtadeami SPR:a jođiheami dikšumii.

Boahtte vahku lean vuođđoláhkaváljagotti gullamis ovttas I várreságadoalli Tiina Sanila-Aikioin ráđđehusa evttohusas ratifiseret ILO 169-soahpamuša. Guovvamánu álggus lea SPR:a ráđđečoakkán sihke Barentsa álgoálbmotkonfereansa Romssas. Dađi bahábut in beasa čoakkámiidda báikke nala go lean juo álgočavčča várren namuhuvvon áigái iežan persovnnalaš olgoriikkamátkki ovdal go namuhuvvon čoakkámat ledje oba dieđusge. Dát lea duođaid šállošahtti, muhto badjála manuide ii dađi bahábut veaje maidege. Dan vahku loahpa bargogohččosat dolvot Anárii, gos dollojuvvo Sámedikki stivrra čoakkán 5.2. ja beaivvi maŋŋel leat diehttelas Sámi álbmotbeaivve doalut.

Vuottesjávrres 25.1.2015

Klemetti Näkkäläjärvi