#http://web.archive.org/web/20141012211406/http://klemetti.blogspot.fi/2012_09_23_archive.html

TIISTAI 25. SYYSKUUTA 2012

Riikkaidgaskasaš deaddu ratifiseret Ilo 169-soahpamuša lassána

Eurohpá Ráđi olmmošriekteáittardeaddji Nils Muižnieks attii odne raporttas ávžžuhusaidisguin Suoma stáhtii Suoma olmmošriektedili buorideami várás. Dieđáhus raporttas, mu sáhka áittardeaddjái ja ieš raporta gávdnojit sámedikki ruovttusiidduin.

Mus lei illu deaivvadit olmmošriekteáittardeddjiin su Suoma guossástallama olis geassemánus. Ságastalaime suinna hui guhká Suoma sápmelaččaid sajádagas ja sápmelaččaid rivttiid olláhuvvama váilevašvuođain. Bukten áittardeaddjái ovdan Suoma sámedikki čoakkáma dahkan evttohusaid Ilo 169-soahpamuša ratifiserenproseassan sihke alimus hálddahusrievtti (AHR:a) dahkan mearrádusaid váikkuhusain dievasmahttit sámedikki válgalogahallama sámedikki oainnu vuostásaččat. Bukten maid ovdan eanan- ja meahccedoalloministeriija biehtadahkes doaladumi Ilo 169-soahpamuša ratifiseremii ja sápmelaččaid riektesajádaga buorideapmái. Mu ipmárdusa mielde áittardeaddji lea ságastallan áššis guossástallamis olis maiddái eanan- ja meahccedoalloministeriijain. Muitalin maid, ahte rasisttalaš ságastallan lea lassánan mearkkašahtti ládje dán jagi Ilo 169-soahpamuša ratifiserenproseassa álggaheami geažil. Sápmelaččat leat juobe uhkiduvvon. Dovddut lea čavgan ja sápmelaččaid rivttiid vuostálastit leat álggahan sápmelašvuostásaš kampánnjaid.

Guossástallama vuođul olmmošriekteáittardeaddji Nils Muižnieks lea čállán raportta ávžžuhusaidisguin, mii guoská Suoma. Áittardeaddji, dego ON:a álgoálbmotraporterejeaddji, EU:a parlameanta, ON:a olmmošriektekomitea, Eurohpá Ráđi ministtarkomitea, Eurohpá Ráđi vehádatrápmakomitea, ECRI (Eurohpá Ráđi vuollásaš komisšuvdna rasismma ja utnohisvuođa vuostá), ON:a nállevealahankomitea, Ekonomalaš, sosiálalaš ja čuvgehuslaš rivttiid komitea, Mánáid vuoigatvuođaid komitea ja ON:a oppamáilmmálaš mearreáiggegeahčadeapmi leat ávžžuhan Suoma ratifiseret Ilo 169-soahpamuša. Riikkaidgaskasaš olmmošriekteorgánat leat hui ovttamielalaččat das, maid Suopma ferte dahkat. Suomas leat dál maŋimus ráđđádallamat báikkis ON:a dorvoolašvuohtaráđđái ja viggamuša doarjjulii riikkaidgaskasaš olmmošriekteorgánaid ávžžuhusaid olláhuhttin. Stáhtaráđi ulbmilin lea gieđahallat álgočavčča mot Ilo 169-soahpamuša ratifiseremis galggalii ovdánit. Eurohpá Ráđi olmmošriekteáittardeaddji Muižnieks evttohii, ahte Suopma árvvoštalalii duođas Suoma sámedikki evttohusa das, ahte Ilo 169-soahpamuša ratifiseren válmmaštallojuvvolii parlamentáralaš komiteas, mas livčče sámedikki ja riikkabeivviid ovddasteaddjit.

Dán vahku lean Helssegis. Odne ledjen vuoigatvuohtaministeriija ásahan sámediggelága ođasteami válmmaštalli bargojoavkku vuosttaš čoakkámis. Sámediggi buvttii čoakkámii iežas evttohusa das, mot bargojoavkku barggus galggalii ovdánit. Muđuid ságastalaimet čoakkámis lagamusat čoakkánáigedávvalis, barggu vuođuin ja ulbmiliin.

Oassálasttán dán vahku maid maid biodiversiteahttabargojoavkku čoakkámii, olmmošriekteáirrasgotti bargoválljagotti čoakkámii, sámedikki stivrra čoakkámii sihke vuoigatvuohtaministeriija giellaáššiid ráđđádallangotti deaivvadeapmái Anáris. Hui hohpos vahkku nappo! Stivrra čoakkáma áššelisttus leat dehálaš áššit. Válljet giellaáššiidčálli virgái sihke ráhkadit evttohusa cealkámuššan sámegielaid ealáskahttinprográmmas ain ovddos sámedikki dievasčoakkáma gieđahallama várás.

Helssegis 25.09

Juvvá Lemet