Luksa guvlui

Mannan vahku mánnodaga oassálasten Anáris dollojun Árktalaš seminárii. Dollen seminára álggahansága, man gávdná suoma- ja davvisámegillii sámedikki ruovttusiidduin http://www.samediggi.fi/index.php?option=com_docman&Itemid=185. Seminára olis deaivvadin Eurohpa-ministtar Astrid Thorsiin, geainna ságastallen sápmelaččaid gielalaš ja kultuvrralaš vuoigatvuođain ja áigeguovdilis láhkaásahanfidnuin. Seminára maŋŋel lei sámedikki ja sámi ruovttuguovllu bálgesiid oktasaščoakkán, mas muitalinnai dárkileappot ovddit blogistan.

Gaskavahkko oassálasten Lappi-bargojoavkku maŋimus aitosaš bargočoakkámii, mas ledje maŋimus evttohusat, nákkahallamat ja vátnamat ovdal raportta almmustuhttima. Dán vahku gaskavahkko dollen Helssegii čoakkámastit. Duorastaga riikkabeivviid eanan- ja meahccedoallováljagotti gullá mu sámedikki oainnuin ráđđehusa evttohusas fuođđovahátláhkan ja láhkan meahccebivdolága § 87 rievdadeamis. Sámediggi lea addán fuođđovahátláhkan cealkámusas geassemánu. Cealkámus, dego earáge sámedikki cealkámusat gávdnojit sámedikki ruovttusiidduin cealkámusat-oasis. Lean ovdal gieđahallan ášši geassemánu blogistan, mii gávdno liŋkkas: http://klemetti.blogspot.com/2008_06_08_archive.html. Sámedikki oaidnu fuođđovahátláhkii lea ein seammalágán, atnit lága váikkuhusaid boazodollui heitodin ja vahátlažžan ja gáibidit áššis ođđa válmmaštallama dego maid gáibidit vuođđoláhkaváljagotti dutkat lága váikkuhusaid riikkavuložiid ovttaveardásašvuhtii, ealáhusbargama friddjavuhtii ja eandalii sápmelaččaid sajádahkii álgoálbmogin ja dan mii lea boazodoalu sámi kultuvrra oassin. Duorastaga deaivvadan hohpolaččat riikkaarkiivva njunnoša ja meinet lea hupmat plánejuvvon sámi arkiiva-fidnus Anára kulturguovddáža oassin.

Bearjadaga Lappi-bargojoavku luobaha loahpparaporttas ealáhusministtar Mauri Pekkarisii. Lean šaddan guođđit raportii sierra oaivila ovttas riikkabeaiveáirras Erkki Pulliaisiin. Muitalan dárkileappot sierra oaivila sisdoalus raportta almmustuhttima maŋŋel. Bearjadaga prográmmas leat maid sámediggelága § 9 miel ráđđádallamat bargo- ja ealáhusministeriijas álbmotlaš gilvonákca- ja kohešuvdnaprográmmas (KOKO). Sámediggi lea addán prográmmas cealkámusa mannan giđa cuoŋománu. Cealkámus gávdno sámedikki ruovttusiidduin cealkámusat 2008-ossodagas: www.samediggi.fi  njulgenbálgát  cealkámusat  cealkámusat 2008. Cealkámusasteamet giddiimet earenoamáš fuomášumi dasa, ahte sámi kultuvra ja ealáhusat galget leat nannosit ovdan KOKO-prográmmas ja sámiid ruovttuguovlu galgá geahčaduvvot iežas kohešuvdnapolitihka doaibmaguovlun ja ovddidanguovlun sámiid sierrasajádaga dihte Suoma áidna ja vuođđolágas dáhkiduvvon álgoálbmogin. Celkkiimet maid, ahte sámi guovllu sierrahástalusaid čoavdin gáibida sámedikki nanu oassálasvuođa ja sámi guovllu sierrasárgosiid áššedovdamuša.


Vuottesjávrres 30.9.2008

Juvvá lemet