Oanehis luomusboahtindearvvuođagat

Máhccen odne bargui oanehis čakčaluomus. Luomus máhccama maŋŋel lea leamaš olu bargu, muhto lihkus leat maid dieđus buorit ođđasat. Oahpahusministeriija lea mieđihan sámediggái ruhtadeami nuoraidlávdegotti vuođđudeami ovdačilgemii. Ruhtadanmearrádus vuođđuduvvá sámedikki árračavčča dahkan ohcamuššii ja dieđus lei buorre vejolašvuohta oažžut ruhtadeami. Ohcamušas mielde sámediggi vuođđuda nu jođánit go vejolaš bargojoavkku ráhkadit ovdačilgehusa ja evttohusa nuoraidlávdegotti dehe sullasaš orgána vuođđudeamis sámediggái. Sámedikki prošeaktaevttohusa mielde bargojoavkkus livčče ee. sámi nuoraid ovddasteaddjit sihke sámi ruovttuguovllus ja dan olggobealde.

Dán vahku prográmmastan lea eanas virgebargu ja sámedikkiid cealkámušaid válmmaštallan. Oassálasttán lávvordaga Suoma iehčanasvuođa vuostáiváldimii presideanttašloahtas. Stuora bargu lea sámedikki cealkámuša addin ođasnuhttinvuloš ruvkelágas. Ruvkeláhkaevttohusas leat mearkkašahtti buorádusat ovddeža ektui sápmelaččaid algoálbmotsajádaga vuhtii váldimis. Dárbu goit livččii, ahte láhkadeavsttas váldojuvvolii vel buorebut fuobmášupmái máŋggabeallásaččabut ja čavgadeappot sámiid álgoálbmotsajádat. Lean goit duhtavaš, ahte juo dán muttos leat váldojuvvon vuhtii sámedikki giđđat dahkan ođđa ruvkeláhkaevttohusa rievdadusevttohusat bargo- ja ealáhusministeriijai.

Earenoamáš buorre ođastus sámi kultuvrra ja ealáhusaid dáfus lea evttohus mášiidnaroggama heaittiheamis golleroggama olis sámiid ruovttuguovllus. Ođđa ruvkeláhkaevttohus evttoha ođđa ruvkeeiseváldin dorvoteknihka guovddáža, TUKESa, ja bidjá geatnegasvuođaid ođđa guovlohálddahuseiseválddiide. Ovttaáigásaččat lea jođus ALKU-fidnu, mii ođasnuhttá stáhta guovlohálddahusa. Jáhku mielde ALKU-fidnu buktá váikkuhusaid maid ruvkeláhkii ja ruvkeláhkaeiseválddiide ja lea vejolaš, ahte eiseváldebarggut sirdojuvvojit guovlluguovdasaš dássái. Dat ii leat mu mielas aivve čuolmmahis ášši ja sávalinnai, ahte ruvkelága ođasnuhttimis galggalii leat mášolaš. Dát lea ákkastallamis danin, vai lága ii dárbbahivčče álgit dakkaviđe rievdadit dan válmmasnuvvama maŋŋel ALKU-fidnu dehe sámiid eananvuoigatvuođaid čoavdima geažil. Livččii dehálaš, ahte ruvkeláhka válmmaštallojuvvolii dassážii go dát mearkkašahtti vuoigatvuođalaš váikkuhusat livčče dieđus ja dat váldojuvvole vuhtii ođđa ruvkelágas. Anán liikká miehtemielalaš áššin, ahte ruvkeláhkabargojoavkku evttohusas lea máinnašupmi sápmelaččaid eananvuoigatvuođaid váikkuhusain ruvkeláhkii.

Mu ovddit blogi (vai galggaliigoson leat blogga?) lea bohciidahttán kommenterema. Suoma boazosámiid searvi ja dan dáhkkeorganisašuvdna Suoma sámiid guovddášsearvi leaba imaštallan mot danguovtto aviisadieđáhusat leat šaddan mu blogii/bloggii. Mu blogi/blogga lea rabas kommeanttaide ja kommenteret sáhttá namaheapmin. Lean diehttelas dulkon, ahte aviisadieđáhusaid leaba doaimmahan mu blogii/bloggii máinnašuvvon vuolláičállin oassebealit. Jos ii leat leamaš ulbmil doaimmahit dieđáhusaid mu blogii/bloggii, de dat sáhtážeaba neavvut iežaska lahtuid boahttevuođas doaibmavuohkeprinsihpain. Suoma boazosámiid ráhkadan dieđáhus, man lea lasihan mu blogii/bloggai anonyyma geavaheaddji, dat gávdnos blogistan/bloggastan (dušše suomagillii) čállon oasis: Saamelaisministerikokouksen tunnelmia (beaivemearri 16.11.) ja deavstta vuolleoasis gávdno kommeantaoassi, man coahkkalemiin beassá oahpásnuvvat kommeanttaide, gos gávdno maid máinnašuvvon dieđáhus. Suoma Sámiid Guovddášsearvvi aviisadieđáhus lea lasihuvvon blogii/bloggai Joatkka sámedikki čoakkánáššiin, beaivemearri 28.10. anonyyma geavaheaddjin. Kommeanttat gávdnojit seamma ládje go bajábealde.



Vuottesjávrres 1.12.2008

Juvvá Lemet