Spiehkastahkan dábálaš blogiide háliidan dán olis gieđahallat maid iežan persovnnalaš áššiid. In áiggo váldit dán vuohkin, ja dás mii lea vulobealde, in hálit dađi eanet kommenteret muhto vuojulduvvat ságadoalli bargguide. Ilus lean fuobmán, ahte ságadoallin válljejupmán lea ožžon olu doarjaga, muhto lea maid bohciidahttán kritihka. Mu birra leat johttáhuvvan sierralágán mu dearvvašvuohtadillái ja doibmii gullevaš šladdarat. Háliidan dás muitalit, ahte mu dearvvašvuohtadilli lea buorre, ja doaimmastan háliidan vuodjit bealeheamit buot sápmelaččaid beroštumiid. Almmatge mu vuostálasti oassebealit leat háliidan bohciidahttit eahpádusaid almmolaččat maid mu ámmátdáiddu guovdu, ja Norgga Sámi rádio lea álgán čielggadit vádjit logi jagi áigásaš čuoččuhusaid, maid ii leat mihkkege vuođuid ja mat leat ovddiduvvon mu vuostá. Háliidan dán blogis muitalit das rahpasit, daningo mus ii leat mihkkege čiehkamušaid dehe heahpanepmošeamosiid.
Dás lea jearaldat sulaid 7-8 jagi áigásaš dáhpáhusas, man áššis in sáhte muitit aivve dárkilis ovttaskasčuoggáid. Dalle go mu čuoččuhe plagieren girjji Bohccuid luhtte, man lea doaimmahan Nils Issát Eira, čállosisttán boazosápmelaččaid luonddubirrasis girjjis Beaivvi Mánát. Plagierenčuoččuhusat leat gomihuvvon máŋgga oktavuođas, omd. Nils Isak Eira, gean girjji mun lean čuoccuhuvvon plagieren, lea lohkan, ahte áššis ii leat mihkkege vuođuid plagierenčuoččuhusaide. Plagierensivaheapmi dáhpáhuvai dan maŋŋel go ledjen válljejuvvon Sámi giellalávdegotti hálddahushoavdan ja válljen ii dalle vissa lean buohkaid miela mielde. Dál sáhttá jearrat manne ášši bajiduvvo fas ovdan. Lean maid dál válljejuvvon bargui, mas lea stuora searvvušlaš mearkkašupmi, ja sihkkarit dánge vuoru mu válljen ii leat leamaš buohkaid miela mielde. Mun jáhkán, ahte dáinna lágiin mu hálidit bidjat eahpidahtti čuvgii, vai sápmelaččat eai anále mu nu luohtehahttin.
Munnje dáin 7-8 jagi áigásaš dáhpáhusain ii leat mihkkege mearkkašumiid dutkin dehe sámi politihkarin. Mus leat olu čállosat, maid gálduid sáhttá dárkkistit. Buot mu dutkamuša gálduid vuođđun leat ee. gieddebarggut ja gáldogirjjálašvuohta, ja daid dieđuid gieđahallamis lean doahttalan dutkamušdahkama etihkalaš rávvagiid. Dábálaččathan dutkamuššii gullevaš plagierenčuoččuhusat guoddaluvvojit dutkama etihkalaš lávdegoddái, muhto mu vuostálastit eai leat dohko áššis guoddalan ja várra danin go dihtet, ahte áššis ii leat mihkkege vuođuid. Sin ulbmiliid lea buorebut bálvalan ášši gieđahallan rádios ja aviissain. Mun in vašut iežan politihkalaš vuostálastiid, muhto sávan sin beassat eallimis ovddos. Háliidivččen álggahit ovttasbarggu maid singuin guoros beavdde nalde ja rahpasit ja vuojulduvvat sápmelaččaid vuoigatvuođaid ovddideapmái. Sihkkarit mii sáhttit atnit sinnai áššedovdamuša Sámedikki doaimmas.
18.2.2008 Juvvá Lemet
0 kommenttia:
Lähetä kommentti