Lásságámmi almmolaš rahpan

Lásságámmi-vuođđudus ásahuvvui 2004, ja dan váldoulbmilin lea gáhttet ja ovddidit Áillohačča kultuvrralaš ja vuoiŋŋalaš árbbi. Su iežas sávaldaga mielde lea vuođđudusa áigumuš hálddašit árbbi dan vuoiŋŋa ja jurddašeami mielde mii boahtá ovdan su bargguin ja almmuhusain.

Lásságámmi, Áillohačča ođđa ruoktu ja bádji, luonddu ja lottiid lahka, govve bures su eallinoainnu. Son huksehii viesu “Beaivi, áhčážan” ja “”Eanan, eallima eadni” hámagiidda, mat leat guovddáš figuvrrat su diktemušas ja dáidagis. Dán viesus lei jurdda ahte son ieš ge, “Eaidanas ealli,” galggai dálostallat, oktan su dáidagiin. Viessu rahppo dál almmolaččat dáiddár- ja dutkidállun dan oktavuođas go Kruvdnaprinsapárra galleda Davvi-Tromssa 28. beaivvi borgemánus 2007. Dán beaivvi maŋŋá besset sisriikka ja olgoriikka dáiddárat ja dutkit geain lea sámi fáddá sin bargguin ohcat Lásságámmis dálostallat mearreáiggi.

Viesu sáhttá láigohit ovtta mánus gitta golmma mánu rádjái. Láigu lea 1000,- NOK mánnui. Stivra árvvoštallá ohcamiid viiddis vuođu alde, ja sii geat hálidit orrut Lásságámmis 2007:s dahje 2008:s, galget sáddet oanehis, vuođuštuvvan ohcama Lásságámmi-vuođđudussii, Omasvuona gielda, 9046 Oteren ovdal 15. b. čakčamánus 2007. Eanet dieđuid gávdná vuođđudusa ruovttusiidduin www.lassagammi.no


Oktavuođaolbmot:
stivraovdaolmmoš Willy Ørnebakk tlf. 911 74752
čálli Maria Figenschau tlf 982 89091