Bállásduoddara birrasa oaidnámušat
Bállásjávri
Bállásjávri lea govvačáppa jávri, man čázeoaivái Bállásduoddarat goalkin speaádjalastet. Biilavuoddji dábuha jávrri álkimusat Sarvvesluovtta ja Bállásluobbala stáffuin, main lea maid goahti dolastallama várás.
Pyhäjoki lákta vuovdi
Bállásjávrái luoiti Pyhäjoki 3,5 km:a guhkkosaš luonddubálggis manná hui lákta suhkkes jogáža guossavuovddis, mas vuogodolggit ráhkadit vehkkes šattolašvuođaid. Mohkkás joga muhtin saji ceakkobákteseainnit hirpmástuhttet vánddardeaddji. Guossavuovddi litna seamolvuođđu geassá olbmuid mielaid ja dahká olu unnanjiččehasslájaide oiddolaš eallinbirrasa.
Taivaskero várdobáiki
Taivaskero lea Bállásduoddariid ja oba duottarráiddu alimus čohkka. Dat lokte geađgás čohkas 807 mettara allodahkii. Taivaskero čohkas sáhttá ovddošit birrasa viidodaga ja duottarluonddu. Čearu alážii lea biddjojuvvon muitoráktu jagi 1952 Olympialaččaid muitun. Suoma olympiadolla cahkkehuvvui Taivaskero alážis idjabeaivvášbáitagis ja dat viegahuvvui sáttatviehkamin Helssegii, mas dat ovttastuvai Athenas boahtán dollii.
Taivaskeroi lea mátki dihkkáduvvon bálgá mielde Bállásduoddara luondduguovddážis 4 km. Bálgá loktaneapmi gárta badjelaš 300 m, nu ahte buot siliseamos vánddardeddjiid čuozáhat dat ii leat.
Montella stohpu
Montella stohpu lea Bállásduoddaris Vuontiskero ja Saivokero sádelis ordda bajábealde. Stohpu doaibmá vánddardeddjiide ávdinstohpun ja boazoolbmuide boazobargguid vuoiŋŋastanstohpun. Vuosttaš stobu huksii 1900-logu álggus guovlomeahccedikšu Justus Montell dutkanmátkkiidis doarjjabáikin. Soađi áigge duššan stobu sadjái huksejuvvui seammalágán.
Keimiöniemi guollestobut
Keimiötunturi vuolde, dan nuorttadavábeale Keimiöjärvi lea dovdamušaidis dáfus earenoamáš. Čáhppes guossavuovddi bajábealde allána Keimiötunturi ja dat orru ceaggáme njuolga jávrris. Keimiöjärvi nuortagátti barta doaibmá beaivestohpun, gosa lea Jerisjärvi luottas mátki 3,5 km. Jerisjärvi Keimiöniemi olu guollestobuidisguin lea okta daid guovlluid kultuvrahistorjjálaš oaidnámušain.
