Dán gease Sámemusea ja Davvi-Sámi luondduguovddáš Siidda parkerensajis leat leamaš valjis biillat, dasgo mátkkálaččat leat boahtalan sihke Suomas ja olgoriikkain galledit Siidda.
Beroštahtti čájáhusat ja áidnalunddot olgomuseabiras leat geasuhan čájáhusgussiid Siidii eanet go diibmá. Geasse- ja suoidnemánus čájáhusaide ostojuvvojedje oktiibuot sullii 16 000 bileahta. Ollislaš galledeaddjimearri Siiddas lea geasse- ja suoidnemánus 34 121, ja dán mearis leat mielde čájáhusgussiid lassin Siida Shopis, Anára turismainfos ja Meahciráđđehusa áššehasbálvalusas fitnan mátkkálaččat.
Geasi áigge Siiddas leat oaidninláhkai vuođđočájáhusaid lassin golbma molsašuvvi čájáhusa. Ná min guossit leat beassan oahpásmuvvat Davvi-Sámi melodanjohtolagaide ja čázi birrajohtimii sihke kulturbirrasii. Geassemánu álggus rahppojuvvui Ruoŧa ruvkefitnu vuostálasti miellačájáhusain čohkkejuvvon čájáhus Gállok Protest Art – Proteastadáidda Gállokis. Buot golbma molsašuvvi čájáhusa leat oaidninláhkai vel čakčatge, gitta čakčamánu loahpageahčai.
Okta dehálaš oassi sihke Sámemusea ja Meahciráđđehusa bálvalusain leat bálvalanbáikkit, mat leat geasi áigge rabas. Meahciráđđehusa luonddustobut Ohcejogas ja Leammis geasuhit olbmuid, dasgo goappásge leat fitnan juo geasse-suoidnemánus badjel duhát olbmo, Ohcejoga juoba badjel guokte duhát olbmo. Ohcejoga luonddustobus rahppojuvvui dán geassebaji áiggus ođđa čájáhus, ja muhtun muddui dan geažil luonddustobus leat guovlladan eanet mátkkálaččat go diibmá. Guktot bálvalanbáikkit leat rabas gitta čakčamánnui, ja nuba vel geargá fitnat oahpásmuvvamin vaikkoba luonddustobuid čájáhusaide.
Sámemusea bajásdoallá maiddái Nuortalaččaid árbevierrodálu Čeavetjávrris ja bálvala mátkkálaččaid čakčamánu loahpa rádjai. Árbevierrodállui ja nuortalaškultuvrii leat geasi áigge oahpásmuvvan badjel duhát olbmo.
Siida lea rabas beaivválaččat 9–20 gitta čakčamánu 19. beaivvi rádjai ja dasto Siiddas sirdásit dálvebaji rabasáiggiide. Restoráŋŋa Sarrit lea rabas beaivválaččat 9–19 geassebaji loahpa rádjai, man maŋŋá Siida ja Sarrit leaba rabas maŋŋebárggas sotnabeaivái 10–17.