Bivnnuhis Luulampi beaivestohpu ja kafea Urho Kekkonen álbmotmeahcis rahpá uvssaidis čuoigiide veháš ovdal čuoiganluomuid guovvamánu 15. beaivvi. Vuohččulaš fitnodatdoalli Iines Magga lea gearggus ja sávvá olbmuid bures boahtin Luulampii. Bálvalusat Luulampis leat seammát go ovdalge, muhto stohpu lea siskkobealde vehá rievdan, go dan leat divodan ja dohko leat buktán ođđa stohpogálvvuid.
Luulampi beaivestohpu divoduvvui geassit 2014. Stohpoláhtti ja lásaid divvo ja maid dollasadji muvrejuvvui ođđasit. Stohpu lea dál olu čuovgadut go ovdal. Divodanbargguin ledje mielde álbmotmeahci bargiid lassin maid Pidä Lappi Siistinä rs:i eaktodáhtolaččat.
Čakčat ja álgodálvvi beaivestobu stohpogálvvuid plánejedje ja ollašuhtte áibbas álggu rájes ođđasit. Juo ovdal stobu seinniin ja lásain ledje diehtogalbbat álbmotmeahci šlájain ja luonddus. Dál luondu boahtá vel buorebut oidnosii stuorra govain.
Beaivestobu oahpistandávvaliid lea plánen ja ollašuhttán dáidagiid magisttar ja oahpaheaddji Venla Väisänen, guhte dovdá álbmotmeahci hui bures. Son lea leamaš guhká álbmotmeahci bargin ja dál son ássá álbmotmeahci nuorta oasis, Savukoskis. Sutnje lei hui álki plánegoahtit ja ollašuhttigoahtit ođđa oahpistanelemeanttaid.
Maiddái Luulampi beaivestobu šilljui leat boahtán smávva nuppástusat. Buoremusat čuoigit fuomášit nuppástusaid, go oidnet sabetstellegiid ja áiddi, mii lea huksejuvvon merkejuvvon johtolagaid báldii ládduid birrasii. Luulampi guovllus leat mearkkašahtti dološbázahusat ja geassit huksejuvvon áiddiin geahččalitge stivret johtolaga ja gohttema nu, ahte hearkkes guovllut oaččošedje leat ráfis. Luulampii leat velá boahtimin oahpistandávvalat, main muitalit dárkilabbot guovllu ovdahistorjjálaš ássanbáikkis.
Beaivestobu kafeadoalli Iines sávvá bures boahtin buot čuoigiide ja vánddardeaddjiide ođđa divoduvvon kafeai. Kafea lea rabas guovvamánu 15. beaivve rájes juohke beaivve diibmu 10-16.
Njukčamánu 17. beaivve Luulampi beaivestobus beasat deaivat maid álbmotmeahci plánejeaddji Kristiina Aikio, guhte muitala áigeguovdilis áššiid ja dáhpáhusaid birra UK-álbmotmeahcis, Tankavári luondduguovddážis ja Saariselkä bálvalanbáiki Kiehisis.