Meahciráđđehusa válmmaštallan Mallá luonddumeahci dikšun- ja geavahanplánahámus lea cealkámušjorrosis. Plánas sáhttá muitalit oaivilis 31.10.2014 rádjái. Plána lea oaidninláhkái Meahciráđđehusa Duottar-Sámi luondduguovddážis Heahtás. Stuorimus plánas evttohuvvon nuppástus guoská bohccuid guođoheapmái guovllus.
Mallá luonddumeahci dikšun- ja geavahanplánas heivehit oktii luonddusuodjaleami ja luonddumeahci mihttomeriid. Čanusjoavkkuin ja álbmotlahtuin leamašan vejolašvuohta váikkuhit plánii earret eará máŋggain álbmotdilálašvuođain, ja plánaevttohussii sáhttá ain guođđit iežas oaivila.
Vánddardeapmi seillošii ovddežis, boazoáidi evttohuvvo
Mallá lea luonddumeahci, man vánddardan- ja eará anu leat ráddjen. Maiddái boazodoallu guovllus lea ásahusa bokte gildojuvvon. Cealkámušjorrosii vuolgán dikšun- ja geavahanplánas evttohuvvo luonddumeahci oasálaš áiduma, vai bohccuid beassama guvlui sáhtašii muddet.
Plánas evttohuvvo maiddái luonddumeahci vánddardananu joatkašuvvama dálá vuogi mielde sihke stobuid ja eará ráhkadusaid ortnega dorvvasteami. Láhttojohtolaga, mii johtá guovllu čađa, linnjá háliidit nuppástuhttit muhtun veardde dorvvolašvuođaákkaid geažil. Luonddumeahci dutkananu háliidit doarjut ja buktit dutkanbohtosiid ain eanet gilbbesjávrilaš turisttaid ja báikkálaččaid dihtui.
Plánas mielde viiddis ovttasbargojoavku
Plána dahkamis leamašan mielde viiddis ovttasbargojoavku, masa gulle ovddasteaddjit Eanodaga gielddas (golbma ovddasteaddji), sámedikkis (njeallje ovddasteaddji), Eanodaga fitnodatdolliin (njeallje ovddasteaddji), Giehtaruohttasa bálgosis, Johtti Sápmelaččain, Lappi luonddusuodjalanbires, Eanodaga fuođđogáhttensearvvis, Eanodaga guolástanviidodagas, Suomen Latu ry:s, Gilbbesjávrri ja Gárasavvona giliservviin, Bealdojávrri ja Suovdiga lappigilleservviin, Bálgosiid ovttastusas, Meahcidutkanlágádusas, Lappi EJB-guovddážis, Sámemusea Siiddas ja Gilbbesjávrri biologalaš stašuvnnas.
Plána gárvvisin jagi loahpa rádjai
Mallá luonddumeahci vuosttas dikšun- ja geavahanplána gárvvisteapmi álggahuvvui jagi 2012 oktanaga Giehtaruohttasa meahcceguovllu ja Sáná guovllu plánaiguin. Giehtaruohttasa ja Sáná plánenbargu joatkašuvvá boahtte jagi beallái, muhto Mallá bokte barggu figgat oažžut gárvvisin dán jagi loahpa rádjai.
Mallá luonddumeahci dikšun- ja geavahanplána lea oaidninláhkái Meahciráđđehusa Duottar-Sámi luondduguovddážis Heahtás. Cealkámušaid ja kommeanttaid bivdit sáddet 31.10.2014 rádjai šleađgapoasttain čujuhussii "kirjaamo(at)metsa.fi" dahje reivviin čujuhussii Metsähallitus/Kirjaamo, PL 94, 01301 Vantaa.
Lassidieđut
- Spesiálaplánejeaddji Arja Vasama, Meahciráđđehus, telefon 0400 241 474, šleađgapoasta arja.vasama(at)metsa.fi
- Duottar-Sámi luondduguovddáš
- Mallá luonddumeahci dikšun- ja geavahanplána, evttohus 30.9.2014 (pdf, 2,7Mt, suomagillii)