Guokte ávdinstobu, mat leat vánddardeddjiid geavahusas, divvojuvvojit njukča-cuoŋománus. Stobut, maid áigot divvut, leat Čuollesmuotkki ávdinstohpu Anárjávrris nuortadavás Čuollesvuona bađas ja Ruskes stohpun gohčoduvvon Geaiggonuori ávdinstohpu, mii lea Anárjávrri lullioasis Čármmanjárgga davágeahčen.
Guktot stobut leat historjjálaččat divrras visttit, vaikkoge eai leat suodjaluvvon. Stobut leat huksejuvvon Sámis dábálaš huksenvieruin ja leat leamaš jávrri alde johttiid anus 1920-logu rájes. Čuollesmuotkki bokte leat olbmot johtán Dážii ja stobu lahkosis lea maid fanassirdinvuojáhat. Ávdinstobut bálvalit ainge vánddardeddjiid earenoamáš bisánanbáikin. Stobuin lea stuorra mearkkašupmi Anára geasse- ja dálveturismma ovddideamis.
Stobuid áigot divvut nu, ahte gudnejahttet daid historjjá. Divvunplánaid leat dahkan restaurema ámmátolbmot. Divvuma maŋŋá boares stobut ožžot fas eallimasaset joatkkaáiggi.
"Čuollesmuotkkis ja Čármmanjárggas dahket áibbas vuođđodivvunbargguid. Doppe stivrejit vuos čáziid eret stobuid lahkosis ja divvot láhttiid. Lásaid eai áiggo molsut, muhto lássagárpmaid gal ođasmahttet. Maiddái minerálulluid váldet eret", muitala Meahciráđđehusa luonddubálvalusaid álbmotmeahccemeašttir Aimo Leppäkangas. Son vástida stobuid divvunbargguin.
Stobut leat eret geavahusas čuovvovaččat:
- Čuollesmuotkki ávdinstohpu 1.3.-15.4.2015
- Rukses stohpu (Geaiggonuorri) 16.3.-30.4.2015
Stobuid divvunbargguin jotket Meahciráđđehusa Lappi luonddubálvalusaid ja Anár gieldda guhkesáigásaš ovttasbarggu Anárjávrri turismma ja virkkosmuvvanbálvalusaid ovddideami ovdii.
Lassedieđut
- Váhčira meahcceguovlu
- Álbmotmeahccemeašttir Aimo Leppäkangas, Meahciráđđehus, tel. 0400 201 866.