Suoločielggi guovllu oaidnámušat
Kaunispää aláš - várddobáiki duoddaris
Kaunispää duottaraláš UK-álbmotmeahci ráji alde lea badjel 400 m alu. Dat lea várddobáiki, gosa lea álki beassat maiddái biillain. Aláža alde lea hui várddus UK-álbmotmeahccái, Soabbada luonddumeahccái ja Bátneduoddara meahcceguvlui.
Karvaselkä gobmegámpá
Karvaselkä gobmegámpá lea dasttán Suoločielggi turismaguovddážis, Tunturihotellis sullii 100 mehtera duohken merkejuvvon johtolagaid guovllus. Dálá báikái dat lea sirdojuvvon ovddeš poastabálgá, dálá Anára -Gihttela -geainnu lahkosiin. Go dát gámpá lei álgobáikkis, de das lávejedje ijastallat badjeolbmot ja vánddardeaddjit. Ijastalliid lohke dávjá morihan ártegis jienaide, maid dagaheaddji ii goassige oainnáhallan. Muitalusaid mielde gámppás livččii gopmahallan. Dán áigge gámpá lea vánddardeaddjiid anus beaivestohpun. Sullii 150 mehtera gámppá davábealde leat Kelo-oja goahti ja muorravisti.
Suoločielggi boarráseamos beahci
Suoločielggi boarráseamos beahci lea miellagiddevaš oaidnámuš guovdu gili. Nuba dasa lea álki oahpásmuvvat. Sullii 530-jahkásaš beahcevuorrasa sáhttá geahččalit salastit, jos beare gieđat ollet dan birra. Beahci lea Suoločielggi gili guovddážis, Kuukkelinkauppas vuolgi Jokostie guoras.
Prospektora ruvke
1902:s huksejuvvon ruvke lea miellagiddevaš oahpásmuvvančuozáhat Suolečielggi beaivevánddardanjohtolagaid guoras, sullii kilomehtera duohken Laanilas. Ruvkefitnodat Prospektor huksii dan goas nu golli ohcama várás. Dán ruvkefitnodaga kantuvra lei Suoločielggi guovllu vuosttas visti, mii duššai nuppi máilmmisoađi áigge. Prospektora ruvkii sáhttá oahpásmuvvat maiddái oanehis beaivevánddardeami oktavuođas. Prospektora ruvkeskurčču ala lea huksejuvvon barttaš, mas sáhttá geahčadit boares golleruvkke.
Moitakuru gárdi
Moitakuru gárdi lea UK-álbmotmeahci davábealde. Dat lea Avvila bálgosa gárdi, mii lea ain anus sihke geassemearkuma áigge ja dálvit gárddástallamiid áigge. Ođđa gárdi lea huksejuvvon 1980-logus. Moitakuru ovddeš gárdi huksejuvvui 1920-logus ja dat lea leamaš nuppe bealde ádjaga sullii kilomehtera duohken dálá gárddis. Dálá gárdái sáhttá álkit oahpásmuvvat birra jagi. Suoločielggis manná merkejuvvon geassejohtolat ja dálvit leat fuolahuvvon láhtut Moitakuru gámpái. Moitakuru gámpá lea boares boazogámpá, mii doaibmá dán áigge vánddardeaddjiide rabas beaivestohpun.
Piispankivi
Laanila buohta váldogeainnu gurrii lea ceggejuvvon nuppi máilmmisoađi áigásaš issoras dáhpáhusaid muitun Piispankivi. Laanilas ruoššaid desántaossodat fallehii davás johtti linnjabiilla 1943:s. Falleheamis jápme Oulu bismagotti bisma Yrjö Aukusti Wallinmaa, nieidaolmmoš Ruth Kjäld, rovvá Aune Hiltunen ja hávváduvvama maŋŋá jámii vel biilavuoddji Paavo Nyqvist. Oaidnámušbáikki luhtte lea oahpistandávval muitaleamen dán falleheamis.
Laanila Gollejohtolat
Laanilas, váldogeaidnu 4:a oarjjabealde vuolgá 7,6 km:a guhkkosaš Gollejohtolat. Gollejohtolaga mielde jođedettiin sáhttá oahpásmuvvat golleroggama historjái ja odnábeaivái. Bálggis manná boares ruvkkiid ja gollerogganbáikkiid bokte. Bálgá mielde jođedettiin sáhttá oaidnit maiddái doaibmi gollerogganbáikki.
Bassi Bávvala Kapealla
Bassi Bávvala Kapealla lea Suoločielggi turismaguovddážis. Dat lea hirssain cehkkojuvvon duottarkapealla, masa čáhket 300 olbmo. Duottarkapeallas lea áidnalunddot áltárdávval; duottarduovdagii rahpaseaddji lássa áltára duohken.
Magnehtaluohkká ja museageaidnu
Muhtun kilomehtera Suoločielggis davásguvlui lea ng. magnehtaluohkká dahjege ceakkoluohkká boares njelješgeainnus, mii lei dehálaš johtolat buotlágan fievrridemiide Anárii ja Beahcámii gitta 1940-logu rádjai. Dákkár namma sáhttá boahtit dan jáhkus ahte eanavuođus livččii lean luohká buohta nu garra magnehtalaš geassinfápmu ahte dat fámohuhtii ee. guorbmebiillaid mohtoriid, go dat johte dakko 1940-logus. Okta čilgehus nama boahtimuššii lea dat, ahte eatnama hámit dagahit dakko optihkalaš čádjádusa, man mielde leaktu orošii iešalddes lassáneamen vuostálahkii vuojedettiin. Geaidnu lea ožžon leat dan dilis go dat goas nu lei. Geainnu birrasiin maiddái dáistaluvvui dálvesoađi áigge. Dán áigge njelješgeaidnu johtá eará saji ja boares geaidnu lea nammaduvvon museageaidnun. Museageainnu guoras lea muitomearka muitaleamen báikki historjjás. Museageainnu guoras lea maiddái dolastallanbáiki ja lávvu. Dálvit museageaidnu doaibmá mohtorgielkájohtolahkan.
Oaidnámušat UK-álbmotmeahcis ja Bátneduoddara meahcceguovllus
Oahpásmuva maiddái UK-álbmotmeahci oaidnámušaide ja Bátneduoddara meahcceguovllu oaidnámušaide.