Váhčira rávvagat ja njuolggadusat

Rávvagat Váhčiris johtaleapmai

• Váhčira meahcceguovllu dikšun- ja geavahanplána (www.metsa.fi, suomagillii)
• Guovllus leat fámus juohke­olbmo­vuoigat­vuođat (www.ymparisto.fi, suomagillii).
• Stáhtaeatnamiin Davvi-Sámis Meahciráđđehus diktá bidjat dola rissiin ja ovssiin almmá sierra lobi haga. Eanamuoraid dahjege eatnamii gahččan árvvuhis muoraid váldimii ja geavaheapmái galgá leat eanamuorralohpi, mii fidne Davvi-Sámi luondduguovddážis Siiddas dahje Meahciráđđehusa Avvila bálvalanbáikkis. Olbmuid sávvet geavahit álo vejolašvuođaid mielde fuolahuvvon dolastallanbáikkiid. Meahccebuollinváruhusa áigge dolastallan lea gildojuvvon maiddái huksejuvvon dolastallanbáikkiin.
• Muitte guođđit almmuhusa alddát, iežat áigetávvalis ja vánddardanjohtolatplánas ustibiiddásat ja lagamus oapmahaččaide dahje Meahciráđđehusa Avvila bálvalanbáikái. Heahtedáhpáhusain galgá vuosttasin geahččalit riŋget nummirii 112! Guovllu gádjunbálvalus lea lága mielde lágiduvvon, ja dasa fidne oktavuođa heahteguovddáža bokte. Muitte almmuhit maiddái, go leat ollen dohko gosa ledjet mannamin, amaset ohcagoahtit du duššiid dihte. Gádjunbálvalus bearrá mávssu dušši ohcamiid dihte.
• Birrasa seasti vánddardeapmi.

Ovddalgihtii ráhkkaneapmi

Mátketelefovnnaid gullon

• Vaikko Suoma mátketelefonfierpmit gokčet viidát riikka, de Váhčira meahcceguovllus sáhttet leat báikkit, main telefovdna ii gullo. Dárkkis mátketelefonfierpmi govčču iežat telefonoperáhtoris. Dasa lassin leat álo báikkit, main mátketelefovdna ii doaimma dahje doaibmá funet. Dalle sáhttá ábuhit dat, ahte manná birastahtti duovdagis badjelii jalges sadjái ja/dahje váldá telefovnna SIM-goartta eret heahteriŋgema boddii. Gánnáha maiddái váldit vuhtii dan, ahte sierralágan mátketelefovnnaid gaskkas leat gullonearut.

Biergasat

• Váhčira meahcceguovlu heive dušše hui hárjánan vánddardeaddjiide. Bálvalusat eai iešalddes gávdno, iige meahcceguovllus birge almmá áššáigullevaš biergasiid haga: galget leat kárttat, kompássa, tealtá, doarvái biktasat, oađđinseahkka ja doarvái niesti.
• Váhčiris leat arktalaš dilálašvuođat, man dihte vánddardeaddjis galget leat áibbas iežaslágan biergasat. Geassi boahtá easkka geassemánu gaskkamuttus ja bissovaš muohttaga muohttá dávjá juo golggotmánus. Dálvit buollašiid áigge sáhttá leat máŋggaid beivviid vuollel 20 gráđa. Jos vánddardeaddji ii leat albmaláhkai ráhkkanan ja sus eai leat albma biergasat, de sáhttá geavvat vaikko man funet.