Ribahis vánddardeapmi easttada bázahusaid šaddama
Ribahis vánddardeapmi stáhta eatnamiin ollašuvvá buoremusat nu, ahte Meahciráđđehus ja vánddardeaddjit ovttas bidjet deattu bázahusaid meari ja daid dagahan birasváikkuhusaid geahpideapmái. Háliidit geahpidit luonddu ribahuvvama ja bázahusaid meahccefievrridemiid dagahan áruid sihke lasihit ordnenvejolašvuođaid ja komposterema. Seammas addit vánddardeddjiide vejolašvuođa bargat birrasa buorrin.
Meahciráđđehus lea maŋemus jagiid čohkken meahccečuozáhagaid bázahusfuolahusa guovlluid boahtinjođáhagaid bázahusaid ordnen- dehege ekobáikkiide. Vuoiŋŋastanbáikkiin leat unniduvvon seahkebázahuslihtit ja komposterenvejolašvuođat sihke bázahusčuvgen lea vástideaddji ládje lasihuvvon. Vánddardeddjiid ovddasvástádussan lea buktit ieš bázahusaideaset meahcis vai daid sáhttá ordnet ekobáikkiide dehe doalvut daid addojuvvon rávvagiid mielde ordnenbáikkiide, maid gielddat bajásdollet.
Bargga ná!
- Báhkke iežat nisttiid seahkaide ja nanu skáhpuide, maid sáhttá bassat. Ná geahpidat bázahusa, mii šaddá vánddardanreaissu áigge.
- Buvtte bázahusaid eret meahcis bázahusbáikkiide, maid gielddat bajásdollet dehe Meahciráđđehusa eko- dehe ordnenbáikkiide.
- Daningo biebmomoalut ja eará biobázahusat háksogohtet álkit, sáhtát guođđit daid vuoiŋŋastanbáikki kompostahivssegii dehe kompostorii. Muittathan, ahte dušše biobázahusat komposterehuvvet: eará bázahusaid ii oaččo bidjat kompostorii.
- Jos reaissus bohtet buolli ribat, boaldde ráinnas báhpira dehe kartoŋgga. Eará ruskkaid – dego alumiidnafolio sisdoalli báhkaid dehe plastihka – ii oaččo boaldit dolas, daningo dain sáhttet šaddat bieđgankeahtes bázahusat ja mirkkolaš gássat.
- Čorge álohii iežat ja dárbbu mielde maid earáid nuskkiid.
Manne?
Árbevirolaš vánddardančuozáhagaid bázahusfuolahus dagaha sihke gaskkalaš ja njulges birasvahágiid. Gaskkalaš váikkuhusat šaddet eandalii dalle, go ruskkaid šaddá fievrridit meahcis eret mášiidnavuimmiin. Ruskkaid fievrrideapmi dagaha šláma, bázahusaid ja muhtimin juobe eananvuođu gollama.
Njulges dehege vánddardeddjiid dagahan váikkuhusat leaba eatnamiid ribahuvvan ja biobázahusaid šaddan seahkebázahusaid searvái, man čuovvumussan šaddá šaddovisteihtaga gievrudeaddji metánagássa.