Skábma lea nohkan Anáris ja farga maiddái Ohcejogas. Go čuvges áigi lassána de lassána maiddái olbmuid olgolihkadeapmi ja Meahciráđđehus maiddái fuolaha meahcis johtti olbmuid dorvvolašvuođas: skohtermáđijaid merken álggahuvvo Anáris loahppavahkus.
Skábma, váimmusdálvvi áigodat, goas beaivváš ii iđe albmeravdda bajábeallái, lea nohkan Anáris. Davimus gielddas, Ohcejogas, seađđi lea šat dušše moatti beaivvi áigge. Njuorggámis skábma nohká 18.1. Skábma nogadettiin čuvges beaivvit guhkkot hui johtilit ja moatti mánu geažes, njukčamánus beaivi lea jo guhkit go idja.
Davvi-sámi álbmot- ja luonddumeahcceguovllus, Anáris giđa olgolihkadeaddjiid dárbbut leat juo barggu vuolde. Álbmotmeahccemeašttir Markku Välitalo muitala, ahte skohtermáđijaid merken Anárjávrri ala álggahuvvo loahppavahkus.
"Vuos merkejuvvo gaska Avvilis Anárii, dan maŋŋá máđidja Anáris Njellimii", Välitalo lohká. Máđijaid figget oažžut merkejuvvot guovvamánu álggu rádjai. Maiddái Anára gieldda fuolahan Avviljoga máđija merkenbarggut álggahuvvojit dán vahkus.
Garra buollašat sirdet bargguid álggaheami mottiin beivviin. Anáris ja Ohcejogas leat leamašan badjel 30 gráđa buollašat jo moatti beaivvi áigge. Muohtadilli lea Välitalo mielde dábálaš dálvvi láhkai, sullii 40-60 sentte. Anárjávrri jiekŋadilli lea buorre.
"Čáhci dušše lea maiddái jieŋa alde", Välitalo muitala. Skohterluottaid merken jieŋa ala bistá sulaid golbma vahku.
Anára kirkosiidda lahkasa luondduláhtuid mielde beassá beaivemohkkái Bielbajávrri ja Juvdujoga čáppa duovdagiidda. Buot láhtut álget Sámemusea ja Luondduguovddáš Siidda šiljus ja daid fuolahit 17.2. rájes muohtadili mielde gitta 18.4. rádjai.
Áigeguovdileamos dieđu máđijaid ortnegis oaččot Meahciráđđehusa Davvi-Sámi luondduguovddáš Siidda áššehasbálvalusas (tel. 0205 64 7740, siida(at)metsa.fi).