Álgoálbmogiid Skábmagovat-filbmafestiválas (22.-26.01.2015) viehka guovddážis lea Latiinnalaš Amerihká álgoálbmogiid filbmabuvttadeapmi. Filbmafestivála lágiduvvo dál 17. geardde Anáris.
Anára XVII filbmafestivála prográmma (www.skabmagovat.fi) lea almmustahtton Skábmagovat-neahttasiidduin.
Festivála váldoguossin lea mapuchebagadalli Jeannette Paillán Chiles. Paillán lei mielde vuođđudeamen CLACPI, man bargun lea ovddidit álgoálbmogiid filbmabuvttadeami. Son maiddái doaibmá Lulli-Amerihká álbmogiid stuorámus filbmafestivála jođiheaddjin. Diibmá ođđajagemánus son oaččui Spánias hui árvvusadnojuvvon Bartolomé de las Casas -bálkkašumi buot das, maid son lea bargan Amerihká álgoálbmogiid buorrin.
Temáprográmmat fállet govvabottožiid ee. Perus, Ecuadoris, Panamas ja Brasilias. Dain gieđahallet máŋggalágan áššiid Peru ketšuaservošiid beaivválaš eallimis Ecuadora kichwaid dáistaleapmái eatnamiiddiset beales.
Skábmagovat fállá maiddái "mieiganstuollomátkki" Ođđa Selánddas gitta Kanada inuihttaguovlluide ja Ruošša jakuhttaduolbadasain Sámeatnama duoddariidda. Muitalusat muitaluvvojit badjel 20 gillii.
Prográmmas leat ee. guokte fiinna oanehisfilbmaráiddu: Sámi filbmaguovddáža (ISF) Film Lab -buktosat Norggas ja Kanadan Quebecis 10 jagi doaibman johtti studio, Wapikoni Mobile, nuoraid bargobájiid dáiddolaš duojit.
Guhkit dokumeanttat gieđahallet losses fáttáid. Maja Hagermana filbma Hur gör man för att rädda ett folk? kárte sámiid goavis sajádaga Ruoŧa gáppus nálledutkamušain, ja tsilhqot'in-bagadalli Helen Haig-Browna guoskkaheaddji persovnnalaš My Legacy fas láidesta geahččiid Kanada internáhttaskuvllaid duskkálaš árbái.
Harry Johansena dokumeanta Ivnnit ja eallin govvida sámedievddu buolli hálo čuožžilit jugešvuođas govvadáiddárin. Niels Ovllá Dunfjella filbma Når speilbildet lyver fas gieđahallá sohkabeallemolsuma problemáhtalašvuođa sámekultuvrras.
Prográmmas lea mielde maiddái jakuhttabagadalli Mihail Lukatshevski iešlágálaš drámá Vilges beaivi fárrolagaid johtti olmmošjovkkožis, geaid biila bieđgana guovu sibirjjálaš jiekŋamáilmmi.
Skábmagovat-festivála lágida Sámedáidaga doarjjasearvi rs, ovttasráđiid Sámemusea ja luondduguovddáš Siiddain, kulturguovddáš Sajosiin, Eamiálbmogiid filbmaguovddáš Skábmain, Sámi oahpahusguovddážiin ja YLE Sápmiin. Ruhtadeaddjin leat Sámeráđđi, Suoma Sámediggi, Lappi kulturdoaibmagotti, Anár gielda, Oahpahus- ja kulturministeriija, Suoma kulturruhtarádju, Lappi ruhtarádju, AVEK – audiovisualálaš kultuvrra ovddidanguovddáš, TAIKE – Dáidaga ovddidanguovddáš.
Festivála suodjaleaddjin doaibmá rovvá Jenni Haukio.
Lassedieđut
- Jorma Lehtola, dáiddalaš jođiheaddji, tel. 050 4144 349.
- Sunna Nousuniemi, buvttadeaddji, tel. 040 9666 318.
- Davvi-Sámi luondduguovddáš Siida