Ođasmuvvan Luontoon.fi-fierbmebálvalus muitala ain čielgaseappot Suoma álbmotmehciid ja eará lundomet báikkiid iešvuođalágis ja buđaldanvejolašvuođain. Oktiibuot buktojuvvojit ovdan badjel 300 vánddardanbáikki. Bálvalusa lea dál álkit geavahit mobiilarusttegiin. Luontoon.fi bivnnutvuohta lea sturron oppa dan 10-jagi historjjás áigge, ja bálvalusas leat dál jo badjel miljon sierra galledeami. Luontoon.fi-siidduid sámegielat veršuvdna lea Lundui.fi.
Luontoon.fi-bálvalusas leat gokčevaš dieđut buot Suoma álbmotmehciin ja eará stáhta eatnamiid luonddusuodjalan-, meahcceeana- ja vánddardanguovlluin, vánddardanbálgáin, historjáčuozáhagain ja luondduguovddážiin. Bálvalusas lea maiddái valjit diehtu luondduvánddardeamis, buđaldanvejolašvuođain, eaktodáhtolašdoaimmas ja luonddus lihkadeami buresbirgejupmeváikkuhusain. Vánddardanbáikkit ja dahkamuš gávdno álkit nu álggahallái go maiddái hárjánan vánddardeaddjái.
Ođđa Luontoon.fi:s leat gidden fuomášumi eandalii álbmotmehciid ovdanbuktimii. Ná luonddutuvrra plánemis lea álki čielggadit, man Suoma 39 álbmotmeahccái gánneha vuolgit, maid dain gánneha dahkat ja makkár bálvalusat doppe leat.
"Leat gárgehan Luontoon.fi-bálvalusa vásáhuslašvuođa, konkretiseren báikeovdanbuktimiid ja vuolidan ná šielmmá lundui lávkemii. Luontoon.fi veahkeha dollet heivvolaš vánddardanbáikái, jus vaikke háliidat vánddardit Suoma boarráseamos vánddardanbálgás dahje geahččat sávzzaid árbevirolaš Suopma-filmma duovdagiin. Sierra luondduvaláštallanšlájaid, dego mealluma ja muohtagámastallama, buđaldeaddjiide leat fállamis vuogas báikecavgilanlisttut buoremus buđaldanbáikkiin", dadjá Luontoon.fi-bálvalusa váldodoaimmaheaddji Katariina Hopponen Meahciráđđehusa luonddubálvalusain.
Luontoon.fi-bálvalus ođasmuvvá maiddái teknihka beales. Ođastusaid vuođđun leat čielggadusat geavaheaddjiid dárbbuin ja bálvalusa geavahanárvvoštallan. Ovddibu máŋggabealagat vánddardanbáikeohcu veahkeha gávdnat heivvolaš vánddardanbáikki. Maiddái navigerema leat figgan dahkat čielgaseabbon. Bálvalus vuogáiduvvá sierrasturrosaš šearpmaide, nuba bláđen mobiilarusttegiin lea ain álkit. Seammás bálvalusa visuála olggosoaidnu lea dahkkon dálááigásažžan ja čuovgagovaide leat addán eanet saji go ovdal. Teknihkalaš ođastusa lea ollašuhttán joensuulaš Arcusys Oy.
Luontoon.fi lea bálvalan vánddardeaddjiid ja luonddumátkkálaččaid jo logi jagi áigge. Dat lea šaddan bivnnuhin ja lasihan galledeaddjimeari jagis jahkái. Jagi 2013 ovttaskas galledeaddjit ledje badjel miljon, ja lassáneapmi lea joatkašuvvan dán jagi. Bálvalusas leat suoma-, ruoŧa-, eŋgelas- ja sámegielat veršuvnnat. Ruoššagielat bálvalusa leat áiddo gárgeheamen. Sámegielat veršuvnnat leat gáržžibut ja dat leat siktejuvvon sápmelaččaid ruovttuguovllu báikkiide ja máđijaide. Davvisámegillii (lundui.fi) leat ovdanbukton 50 vánddardanbáikki Davvi-Suoma guovllus ja lassin stuorámus gávpogiid lahkosa álbmotmeahcit. Anárašgillii (aanaar.lundui.fi) vánddardansiidduin leat lagamustá anárašgiela giellaguovllu báikkit ja logemat máđija. Nuortalašgielat siidduin leat vihtta vánddardanbáikki.
Maiddái Retkikartta.fi doaibmá mobiilabirrasis
Luontoon.fi-bálvalusas ovdanbuktojuvvon vánddardanbáikkiid dárkilis kárttaid sáhttá bláđet nuvttá Retkikartta.fi-kártabálvalusas. Ođastusa mielde maiddái Retkikartta.fi oidno jo vánddardanbáikki ovdasiiddus Luontoon.fis. Dán čavčča maiddái Retkikartta.fi-bálvalus rievdaduvvui geavaheaddjiid sávaldagas buorebut doaibmin mobiilabirrasis. Goappáge bálvalusa mobiilageavaheapmi gáibida neahttaoktavuođa.
Luontoon.fi- ja Retkikartta.fi-bálvalusaid bajásdoallama ovddasvástádus lea Meahciráđđehusa luonddubálvalusain.
Lassidieđut:
- Meahciráđđehusa luonddubálvalusat / fierbmeváldodoaimmaheaddji Katariina Hopponen, tel. 040 821 3855
Meahciráđđehusa luonddubálvalusat suodjala ja dikšu álgovuđolaš ja áittavullosaš suopmelaš luonddu ja buvttada luonddus lihkadeaddjiide vánddardanbálvalusaid. Min ovddasvástádussan leat riikamet álbmotmeahcit, luonddumeahcit ja eará stáhta suodjalanguovllut, davvi meahcceeanaguovllut ja Meahciráđđehusa fuođđoáššit.