Urho Kekkonena álbmotmeahci eallit

Goaskin ja 129 eará loddešlája

Urho Kekkonen álbmotmeahcis leat áican sullii 110 jeavddalaččat bessejeaddji loddešlája, maid joavkkus lea bárbmofálli ja máŋggat eará áitatvuloš šlájat. Álbmotmeahci dovddaldatloddi lea goaskin. Dábáleamos lottit maid galledeaddji deaivvada leat vintán, rievssatcizáš, niitocivkkán, ruksessuodjá ja ummolcizáš. Álbmotmeahci loddešlájain sullii 75 proseantta leat bárbmolottit, ja vuosttamužžan máhccá beahcegáski juo guovva-njukčamánu molsašumis.

Álbmotmeahci mehciin sáhtát deaivvadit mihtilmas boares vuvddiid lottiid, dego guovssaha, gaccepačča dahje čáihni. Duottarjalgadasa rabas eatnamiin loktet bižus ja láfol. Jeakkis sáhtát oaidnit gálašeaddjiid, dego uhcačovžoža, rávgoža dahje meahkástaga.

Tipsa: Háliidatgo diehtit, mat lottit Urho Kekkonena álbmotmeahcis guovllus leat mannán áiggiin áicojuvvon? Geahča varraseamos loddeáicamiid (suomagillii). Fálaldaga fállá Meahciráđđehusa Luontoon.fi-neahttasiidu. Siidu lea buvttaduvvon BirdLife Suoma Čearret-loddeáicansystema vehkiin.

Albbas, nirpi ja eará njiččehasat

Álbmotmeahci eatnamiin ellet badjel 20 njiččehasšlája. Boraspiret guovža, geatki, gumpe ja albbas oainnahallet vánddardeaddjiide dušše hárve; lea vuorddehahtti ahte deaivvat álbmotmeahcis bohccuid, njoammiliid, ealggaid ja riebaniid. Álbmotmeahcis ellet maid vándát ja muolddahat ja daid bivdi smávvaboraspiret: neahti, buoidda ja nirpi. Čázádagaid lahka sáhtát oaidnit čeavrá dahje dan guollebivdoreaissu luottaid.

Guolit, njoammut ja šlieddaeallit

Mottiin álbmotmeahci jogain eallá áitatvuloš johkaskálžu. Soabbada álbmotmeahcis sáhtát vel deaivvadit bosttagearbmaša, muhto Suoločielggi duoddariid davábealde dat ii loavtte.