Meahciráđđehus lea válmmaštallan Urho Kekkonen álbmotmeahci dikšun- ja geavahanplánahápmosa ja dat lea dál cealkinjorrosis. Plánaguvlui gullet maid Soabbada luonddumeahcci, Kemihaara meahcceguovlu sihke Vaaranaava, Uura-aava ja Nalka-aava jeaggesuodjalanguovllut. Plánas sáhttá muitalit oaivilis 19.11.2014 rádjái. Plána lea oaidnimis Meahciráđđehusa neahttasiidduin metsa.fi/hks suomagillii.
Virkkosmahttingeavahus čohkkejuvvo ovtta sadjái, ođđa tuvravejolašvuođat fállun
Urho Kekkonen álbmotmeahci ja lagasguovlluid dikšun- ja geavahanplánas heivehuvvojit oktii luonddusuodjaleami mihttomearit ja guovllu bálvalusaid gárgehandárbbut.
Plánahápmosis álbmotmeahci virkkosmahttingeavahusa avádagas evttohuvvo, ahte dat unniduvvo nu ahte dat gokčá Suoločielggi- Gilonoaivvi turistaguovllu stuorámus geavaheaddjimeriid guovlu. Seammás boaittobealdavádat stuorru.
Ođđa dikšun- ja geavahanplánahápmosis evttohuvvo ahte ođđa tuvrahápmi sihkkelastin livččii lobálaš merkejuvvon geasse- ja dálvejohtolagaiguin. Nuortijoga meallunvejolašvuođaid háliidit buoridit dainna ahte kanohtaid oččošii fievrredit njealjejuvllagiin joga luhtte lagasgeidnui.
Álbmotmeahccái leat ovdal sáhttán juolludit lobiid turisttaid fievrrideapmái mohtorgielkkáiguin Kemihaaras Bealljeduoddarii. Plánahápmosis evttohuvvo maid vejolašvuohta Kakslauttases Niilaoaivái ja Dáŋgeváris Jorpulioaivái. Meahci oarjeráji turistabálvalanmáđija evttohit váldit eret.
Lussii juo, ájarávdui ii
Dikšun- ja geavahanplánahápmosis evttohuvvo Meahciráđđehusa luonddubálvalusaide aktiivvalaš rolla Tuulomaa luosa máhcaheapmái meahccái. Maiddái goargŋu dápmotnáli čuovvuma háliidit fásta vuogádahkan. Ájarávddu leavvama álbmotmeahccái viggat caggat.
Plánemis mielde viiddis ovttasbargojoavku
Dikšun- ja geavahanplána dahkamis lea leamaš mielde viiddis ovttasbargojoavku, masa gullet ovddasteaddjit plánaguovllu gielddain, eiseválddiin, bálgosiin, sámedikkis, nuortalaččaid siidačoahkkimis, museain, dutkanlágádusain ja servviin. Lassin plánenbarggus leat leamaš mielde sierra sámedikki ja nuortalaččaid siidačoahkkima nammadan Akwé: Kon –joavku.
Urho Kekkonen álbmotmeahci ja lagasguovlluid dikšun- ja geavahanplánahápmosid sáhttá addit kommeanttaid 19.11.2014 rádjái. Plána lea oaidnimis Meahciráđđehusa neahttasiidduin www.metsa.fi/hks (suomagillii). Cealkámušat ja kommeanttaid bivdit sáddet šleađgapoasttain čujuhussii kirjaamo(at)metsa.fi dahje reiven čujuhussii Metsähallitus/Kirjaamo, PL 94, 01301 Vantaa.
Urho Kekkonen álbmotmeahcci lea min okta bivnnuheamos álbmotmehciin ja fállá earenoamáš tuvravejolašvuođaid sihke beaivetuvrralaččaide ja gáibideaddji meahccevánddardeddjiide. Urho Kekkonen álbmotmeahcis fitne diibmá 300 000 háve. Álbmotmeahcci buktá barggu unnimustá 134 persovdnabargojagi veardde ja boađusváikkuhus báikkálašekonomiijai lea 10,2 miljovnna euro.