// Om NAV // Kontakt oss
Sáhtát váidit NAV:i jus du ohcan hilgojuvvo ollásit dahje belohahkii.
Mearrádusas oaidná makkár hápmi gáibiduvvo váidagis. NAV-kantuvra lea geatnegahtton veahkehit du čállit váidaga. Sáhtát maiddái geavahit NAV veahkkeskovi váidagii.
Dus lea riekti váldit mielde olbmo geasa luohtát go finat NAV-kantuvrras. Sáhtát maiddái addit fápmudusa advokáhttii dahje ustibii gii giehtaguššá váidaga du ovddas.
Váidaga sáddet iežat NAV-kantuvrii. Galggat váidit NAV Veahkkeneavvoguovddážii jus sii leat mearrádusa dahkan.
Kantuvra mii lea mearrádusa dahkan, árvvoštallá du ášši ođđasit, go váiddát. Jus mearrádus ii rievdda dáppe, de váidda sáddejuvvo viidáset gieđahallamii NAV Váidinásahussii, mii guorahallá ja árvvoštallá ášši ollásit.
Váidináigemearit leat dan duohken makkár ášši don háliidat váidit. Mearrádusas ovdanboahtá váidináigemearri.
Váidináigemearri lea guhtta vahku dan rájes go vuostáiválddát dieđu mearrádusa birra. Áššit mat ovdamearkka dihte gieđahallojuvvojit álbmotoadjolága mielde leat buohcanruđat, beaiveruđat ja lámisvuođapenšuvdna.
Dábálaččat doaibmá hálddašanlága váidináigemearri, mii lea golbma vahku dan beaivvi rájes go vuostáiválddát dieđu mearrádusa birra. Ovdamearkan leat mearrádusat áššegoluid birra. Hálddašanlága áigemearri gusto jus fal ii mihkkege eará leat mearriduvvon dan lágas man vuođul mearrádus lea dahkkojuvvon. Ovdamearkkat guhkit váidináigemearrái lága vuođul leat áššit ovdagihtii mávssu birra ja indiviidadoarjagiid áššit main váidináigemearri lea guhtta vahku.
Sáhtát guoddalit ášši Oadjoriektái jus NAV hilgu du ášši. Earret soames spiehkastemiid, sáhttá Oadjoriektái guoddalit mearrádusaid mat dahkkojuvvojit álbmotoadjolága vuođul. Guoddalanáigemearri lea guhtta vahku dan rájes go oaččut NAV Váidinásahusas dieđu mearrádusa birra.
Guoddalusa sáddet iežat NAV-kantuvrii. NAV Váidinásahus dalle gieđahallá du ášši ođđasit. Jus mearrádus ii rievdaduvvo, de guoddaleapmi sáddejuvvo Oadjorievtti gieđahallamii.
Lassin álbmotoadjolága áššiide sáhttá maiddái áššiid dákkár lágaid/ortnegiid vuođul guoddalit Oadjoriektái:
NAV Váidinásahusa mearrádus váhnenmávssu ja indiviidadoarjagiid áššiin lea loahpalaš ja daid ii sáhte váidit Oadjoriektái.
Jus fal váidda váldojuvvo vuhtii, de sáhttá dus leat riekti oažžut buhtaduvvot dehálaš goluid mat ledje dárbbašlaččat mearrádusa rievdadeapmái, ovdamearkka dihte advokáhttagoluid. Áššegoluid gokčama gáibádusa sáddet iežat NAV-kantuvrii.
Sáhtát váidit Siviilaáittardeaddjái jus it leat duhtavaš ášši bohtosiin dahje NAV áššemeannudemiin.
Sáhtát fievrredit ášši Lágamánneriektái jus it leat duhtavaš Oadjorievtti diggemearrádusain. Áigemearri vuolggahit ášši lea guhtta mánu dan rájes go leat ožžon dieđu Oadjorievtti diggemearrádusa birra.
Fertet iskat makkár áigemearit gustojit jus áiggut vuolggahit ášši diggegoddái dahje nammariektái áššiin main NAV Váidinásahus lea dahkan loahpalaš áššemearrádusa.
Dus sáhttá maiddái leat riekti oažžut nuvttá riekteveahki advokáhtas. Advokáhtat leat geatnegahtton nuvttá muitalit dutnje dán ortnega birra. Sáhtát ieš ohcat Fylkkamánnis nuvttá riekteveahki dahje sihtat iežat advokáhta ohcat du ovddas. Dás leat vissis dienas- ja opmodatrájit vuođđun.
Dáppe leat deháleamos dieđut vuoigatvuođaid ja geatnegasvuođaid birra. Eambbo dieđuid gávnnat liŋkkaid bokte. Muhtin dieđut leat beare dárogillii.
