“Nu guhkás mun girddán” - Merja Aletta Ranttila dáiddačájáhus

Merja Aletta Ranttila riegádii viđamáná sámebearrašii Gáregasnjárggas Ohcejoga gielddas 1960:s. Mánnávuođa ásodatáigi, givssidanvásáhusat ja sivalašvuođadovdduid bohciidahtti lestadiolaš osku čuhce sakka dien ahkásaš olbmui. 1980:s Ranttila beasai stuđeregoahtit Lappi dáiddaskuvlii Durdnosii. Go son lei das geargan, de dievasmahtii iežas oahpu Roavvenjárgga dáiddaindustriijaoahppolágádusa gráfalaš linnjás jagiid 1982-86.

Dalle álgoáiggiid Merja Aletta Ranttila lávii govvet oahppa- ja máinnasgirjjiid sihke noveallačoakkáldagaid ja románaid. Sus diŋgojedje erenoamážit sámefáttáid. Son gávdnagođii iežas dáiddalaš ovdanbuktinvuogi 1990-logu álggogeahčen, go bargagođii linograverenteknihkain. Linoteknihkain sáhtii dahkat nana čáhppadiin vilges vuođu vuostá stiliserejuvvon hámiid, maid dáiddár dievasmahtii daid ala málejuvvon ivdnegerddiiguin.

Ranttila beaggigođii viidáseappot 1993:s, go su duojit ledje ovdan Meri-Lappi šamánageasi daiddatriennale oktavuođas Aine dáiddamuseas. Duskkálaš nissonfiguvrraid biinnideaddji birot eaddudedje davviguovlluid báhpaid ja dáiddára sivahedje satanismmas ja šamanismmas.

Merja Aletta Ranttila dáidagii leat álgojagiid sevdnjeslágan dujiid maŋŋá ihtigoahtán maiddái čuovgadet ivnnit muhto dallege gos nu duohken oidnosta dávjá čáhppeslágan suoivva. Su dujiin gávdno maiddái spivka ja leaikkastallan. Govvadáiddáreallima áigge dahkkojuvvon máŋggain iešgovain vuhttojit persovnnalaš eallima čuolmmaid suokkardeamit.

Merja Aletta Ranttila lea ožžon moanaid mearkkašahtti dovddastusaid iežas dáiddalaš barggu ovddas, ee. Mánáidkultuvrra stáhtabálkkašumi (1993), Urpo ja Maija Lahtisen säätiö dáiddabálkkašumi (1994) ja Sámedikki kulturbálkkašumi (2000). Su dáiddalaš duojit leat máŋgga mearkkašahtti čoakkáldagas ja su dáidda lea leamaš ovdan lohkameahttun čájáhusain sihke Suomas ja olgoriikkain. Ranttila ássá ja bargá Anáris.

Čájáhus lea rabas 12.10.2012-27.1.2013.

Lassedieđut:
Merja Aletta Ranttila, aletta(at)mbnet.com 
Intendeanta Arja Jomppanen, Sámemusea Siida, tel. 040 579 3313,  arja.jomppanen(at)samimuseum.fi