Bivttastallat

Maarit Magga logai sámegiela ávnnasoahpaheaddjin Oulus ja bargá dán áigge sámegiela lektorin Heahtá skuvllas. Maarit Magga gohčoda duddjoma iežas "nubbin eallimin". Duddjon lea mánnávuođa rájes mearkkašan hui ollu badjebearrašii riegádan Magga eallimis:

"Lean álo oaidnán duddjoma iežan ruovttus. Eadni, Iisko-Ándde Ánne, ja das lahkosiin ássan su boarráseamos oabbá, mu Elle-goaski, leigga álggos várra dego fuomáškeahttá mu deháleamos doarjut ja movttiidahttit. Eadni lei dahkan olgosávnni gámmáris alccesis duddjonlanja. Muittán ainge hája, go sávnnis bulii dolla ja mo eadni ja Elle-goaski ovttas goaruiga nuvttohiid dahje goas ain maid. Dál ádden oktonassii buđaldettiinan, man dehálaš ja divrras eadnái ja mu goaskái lei ovttas duddjon ja nubbi nuppi doarjun."

Árbevirolaš sámeduoji materiálat – áinnas boazu – leat Maarit Maggai ráhkis ja oahpes materiálat. Magga deattuha ahte vuos galgá máhttit árbevirolaš duddjonvirolašvuođaid, dovdat ja hálddašit materiálaid ja daid gieđahallama, ja easkka dasto sáhttá ieš geahččaladdagoahtit. Magga gárvvuin vuođđun leat dábálaččat juogo boazomateriálat dahje láđđi, ja vuođđovadjan dáhpáhuvvá dávjá árbevirolaš sámegávtti málle mielde. Su geahččaladdanmiella gárvvuin boahtá ovdan ođđa materiálaid oktiibidjun ja anolašvuohtan – ja maiddái ođđamállesaš dávviriin.

Maarit Magga gárvvásmuvai sámeduoji kandidáhttan (bachelor) geassit 2011 Sámi allaskuvllas Guovdageainnus. Oassi dain gávttiin ja gárvvuin, mat dál leat oaidnimassii, leat gárvvistuvvon oahppočájánasduodjin. Čájáhusas lea ovdan  Maarit Magga loahppabargu, "Eŋgelmáná gietkka", man son duddjui iežas njealjejahkásažžan jápmán Sálmmo-bártnáža muitun. Dán duoji bokte son lea guorahallan morraša ja kreativitehta gaskavuođa.

Suoma kulturruhtarádju, Lappi ruhtarádju, Sámediggi ja Sámeráđđi leat dorjon Maarit Magga dáiddalaš barggildeami ja leat leamaš veahkkin doarjumin maiddái Bivttastallat – Vaatetella -čájáhusa gárvvásmuvvama. Čájáhusa čiŋaid lea ráhkadan Johanna Labba (Silba Design).

Čájáhus lea ovdan Siiddas ođđajagemánu 2012 loahpa rádjai. Siida lea dálvebaji áigge rabas maŋŋebárggas sotnabeaivái diibmu 10–17. Buresboahtin!

Lassedieđut:
Maarit Magga, tel. 0400 937 659, mmagga(at)suomi24.fi, dahje intendeanta Arja Hartikainen, Sámemusea Siida, tel. 040 579 3313, arja.hartikainen(at)samimuseum.fi