Eatnanšaddu – Luonddušattuid geavaheapmi -neahttačájáhus rahppojuvvon

Háliidatgo lassedieđuid boskkas? Leago bárken dahje duovlun dutnje oahpes ášši? Čujuhussii www.samimuseum.fi/eatnansaddu čohkkejuvvon siidduin ovdanbuktojuvvojit sámiid geavahan luonddušattut, daid šaddanbirrasat ja geavahanvuogit. Gokčevaš diehtopakeahta lea dievasmahttimin šaddodiehtovuođđu, masa leat vurkejuvvon sullii 50 luonddušaddui guoskevaš dieđut sihke bargobihttáoassi, mainna sáhttá testet dieđuidis davviguovlluid luonddušattuin.

Eatnanšaddu -čájáhus lea ollašuhtton oassin Sápmi Miehtá -fitnus, man leaba ruhtadan Eurohpá sosiálaruhtarádju ja Lappi ELY-guovddáš. Sámi Oahpahusguovddáža láidestan fitnus lei ulbmilin láhčit Sámegiela ja kultuvrra virtuála ovddidan- ja oahppanbirrasa. Dát fidnu gergejuvvui mannan jagi loahpas ja das láhččojuvvui doaibmamálle das, mo sámegiela ja -kultuvrra gáiddusoahpahus ollašuhttojuvvo riikkadásis ja mo museaid ja girjerájuid sámečoakkáldagat sáhttet leat veahkkin dákkár oahpahusas. Sámemusea ja Luondduguovddáš Siida doaimmahii fitnu áigge sisdoallomateriála virtuálaskuvlla oahpahusa doarjjan. Eatnanšaddu – Luonddušattuid geavaheapmi lea okta dán prošeavtta olis almmustuhtton oahppanbiras- ja diehtosiidofáldaldat, mii lea oaivvilduvvon buohkaid atnui.

- Eatnanšaddu -čájáhus, mii lea leamaš goas nu oaidninláhkai Siiddas, geasuhii sakka min gussiid. Čájáhusas ledje mielde ollu dieđut, maidda lea ainge atnu, muitala museahoavda Sari Valkonen. Fitnu vuođul čájáhussii čohkkejuvvon dieđut váldojuvvojedje fas atnui ja dat leat oaivvilduvvon buohkaid várás.

- Dál dieid dieđuid sáhttet fas buohkat dutkat neahttasiidduin ja ná giđabeallai diet álgá leat juo áigeguovdilis fáddá, jos áiggoš čoaggit boahtte gease rádjui ávkešattuid, dadjá Valkonen.

Eatnanšaddu -neahttačájáhus lea buvttaduvvon golmma gillii: suoma-, eaŋgals- ja davvisámegillii.

Lassedieđut:

Sámemusea Siida, museahoavda Sari Valkonen, sari.valkonen@samimuseum.fi, 040 767 1052
Davvi-Sámi luondduguovddáš Siida, luondduguovddášdikšu Kirsi Ukkonen, kirsi.ukkonen@metsa.fi, 0400 479 986.